ಎತ್ತಣದನಿಯಿದು ಎತ್ತಣ ಮಧುರವ
ಚಿತ್ತಾಕರ್ಷಕ ಬಾನುಲಿಯೇ ಪ
ಮತ್ತ ಭೃಂಗಾಳಿಯ ಝೇಂಕೃತಿ ಶ್ರುತಿಯು
ಸುತ್ತ ಮಯೂರದ ನಾಟ್ಯದ ನಲವೋ ಅ.ಪ
ಏಣಲೋಚನೆಯರ ಕಾಂಚನ ಕಿರುಗೆಜ್ಜೆ
ವೀಣಾನಾದವ ಅಣಕಿಪುದು
ತಾಣವದೆಲ್ಲಿಯೋ ಕಾಣಿರೆ ಸಖಿಯರೇ
ವೇಣು ಗೋಪಾಲನ ನಾಟ್ಯವಿದಲ್ತೇ 1
ಅಲ್ಲಿ ನೋಡೇ ತಂಗಿ ಬಾನೆಡೆಯಿಂದಲಿ
ಮಲ್ಲಿಗೆ ಪೂಮಳೆ ಸುರಿಯುತಿದೆ
ನಲ್ಲೆಯರಿಂಚರ ಸರಿಗಮಪದನಿಯು
ಎಲ್ಲ ರಾಗಗಳಲಿ ನಲಿಯುತಲಿಹುದು 2
ಅಂಗನೆಯರೆ ನಮ್ಮ ಗೆಜ್ಜೆಯ ಝಣರವ
ಮಂಗಳಗಾನಕೆ ಇಂಬಿರಲಿ
ಹೊಂಗೊಳಲೂದುವ ಚಿನ್ಮಯ ಮಾಂಗಿರಿ
ರಂಗನ ದರ್ಶನ ಮಾಡುವ ಬನ್ನಿ3

ಝಣ ಝಣ ಝಣರೆಂದು ಕುಣಿವುದ ನೋಡೆ
ಫಣಿಪತಿ ಶಯನನು ಕಾಣುವ ನೋಡೆ |ನಾಡೆ ಪ
ಕಿಣಿ ಕಿಣಿ ಕಿಂಕಿಣಿ ಕಿಣಿರವ ಕೇಳೇ
ಮಣಿ ಮಣಿದಾತನ ನಾಮವ ಪಾಡೇ ಅ.ಪ
ನೋಡುವ ನಲಿಯುವ ಹೊಂಗೊಳಲೂದುವ
ಪಾಡುವ ಕರೆಯುವ ನಗಿಸುವ ನಗುವಾ
ಮಾಡೆ ವಂದನೆಗಳ ಸಂತಸಗೊಳುವಾ
ಬೇಡುವರಿಷ್ಟವ ಕರುಣದಿ ಕೊಡುವಾ 1
ಬೃಂದಾವನದಾನಂದದ ನೋಟಾ
ಮಂದಗಮನೆಯರ ನಲವಿನ ಕೂಟಾ
ಇಂದಿರೆಯರಸ ಮಾಂಗಿರಿಪತಿಯಾಟಾ
ಸಂದಪುದೆಮಗೆ ಬಾ ಕೃಷ್ಣನೊಳಾಟಾ 2