ಕೋಲು ಕೋಲೆ ಕೋಲು ಕೋಲನ್ನ ಕೋಲೆ
ಮೂಲೆ ಮೂಲೆಯ ಹೊಕ್ಕು ಅಡಗಿರ್ದ ಕೋಲೆ ಪ
ಕೆಂಜಿಗ ಉಡನು ಬಂದು ಮುಂಚಿಕವಲ ಕೊಟ್ಟು
ಅಂಚೆಡೆಗಳನೆಲ್ಲ ಸುಲಿದರ್ದ ಕೋಲೆ 1
ಆನೆ ಕುದುರೆಯಿಲ್ಲ ಸೇನೆ ಬಹಳವಿಲ್ಲ
ಏನೆಂದು ಬೆಸಗೊಂಬರಿಲ್ಲದ ಕೋಲೆ 2
ಮುನಿಯ ಭಾವನದಂಡು ಮನೆ ಮನೆಗಳ ಹೊಕ್ಕು
ಧನಕನಕಂಗಳ ಸುಲಿದಿರ್ದ ಕೋಲೆ 3
ಮಕ್ಕಳು ಮರಿಗಳು ವೃದ್ಧ ಜವ್ವನರನ್ನು
ದಿಕ್ಕುದಿಕ್ಕಿನ ಕಾನಿಗಟ್ಟಿದ ಕೋಲೆ 4
ಜನರನ್ನು ತರಿದು ಸುಲಿದು ಕರುಗಳ
ತರುಗಳ ಹಿಂಡನು ಹೊಡೆದಿರ್ದ ಕೋಲೆ 5
ಕೊಟ್ಟ ಕಣ್ಣಿಯನೆಲ್ಲ ಕಿತ್ತೊಯ್ದು ಸೂಸ್ಯಾನು
ಪಟ್ಟೆ ಪೀತಾಂಬರಗಳ ನೊಯ್ದ ಕೋಲೆ 6
ಕಾಣಿ ಜೀವರನೆಲ್ಲ
ಹಾಡಿ ಹಿಳಿದು ಹಿಪ್ಪೆಹೀರಿದ ಕೋಲೆ 7
ಇಟ್ಟವಡವೆ ವಸ್ತು ಇಟ್ಟಲ್ಲಿ ಇಲ್ಲದೆ
ಕೆಟ್ಟು ಜನರು ಹೊಟ್ಟೆ ಹೊಡಕೊಂಬರು 8
ಉಟ್ಟು ತೊಟ್ಟುದನೆಲ್ಲ ಸುಲಿದುಬೆತ್ತಲೆ ಮಾಡಿ
ಬಿಟ್ಟು ಮನೆಗೆ ಬೆಂಕಿ ಕೊಟ್ಹೋದ ಕೊಲೆ 9
ಕೆಲರ ತಲೆಯ ಕುಟ್ಟಿ ಕೆಲರು ಸುಲಿದು ಬಿಟ್ಟು
ಕೆಲರಿಗೆ ಮುರುವಾಳ ವಿಕ್ಕಿದ ಕೋಲೆ 10
ಅಟ್ಟಡಿಗೆಯ ನುಂಡು ಇಟ್ಟೊಡವೆಯ ಕೊಂಡು
ಕುಟ್ಟಿ ಖಂಡವ ಚೂರು ಮಾಡಿದ ಕೋಲೆ 11
ಉಪ್ಪಿನಕಾಯಿ ಕೊಡ ತುಪ್ಪ ತೈಲದ ಪಾತ್ರೆ
ಜಪ್ಪಿ ವಡೆದು ನೆಲ ಕುಣಿಸಿದ ಕೋಲೆ 12
ಚಿನ್ನ ಚಿಗುರು ಬೆಳ್ಳಿ ಕಂಚು ತಾಮ್ರಗಳನ್ನು
ನುಣ್ಣಗೆ ಹೊರೆಗಟ್ಟಿ ಹೊತ್ತೊಯ್ದ ಕೋಲೆ 13
ಉಣ್ಣ ಉಡಲಿಕ್ಕಿಲ್ಲ ಹೊನ್ನು ಕೈಯೊಳಗಿಲ್ಲ
ಎಣ್ಣೆ ಬೆಣ್ಣೆಗೆ ಬಾಲ ನಳಿಸಿದ ಕೋಲೆ 14
ಮುಂಜ ಮುಚ್ಚಲಿಕಿಲ್ಲ ಗಂಜಿಗೆ ಲವಣಿಲ್ಲ
ಸಂಜೆ ದೀಪಕೆ ತೈಲವಿಲ್ಲದೆ ಕೋಲೆ 15
ಅತಿಥಿಗಿಕ್ಕಲಿಲ್ಲ ಪ್ರತಿಮೆ ಪೂಜೆಗಳಿಲ್ಲ
ವ್ರತನೇಮಗಳನು ಕಟ್ಟಿರಿಸಿದ ಕೋಲೆ 16
ತೆಪಕಾರನ ಪದಾರ ಕಾಲಟದೊಳು
ಜಪ ತಪಗಳಿಲ್ಲದೆ ಕೊಳ ತನ್ನಿಸಿದ ಕೋಲೆ 17
ನಗರದ ಕೋಲೆದ್ದು ತೆಪರಾರ ಮೇಲ್ಬಿದ್ದು
ಜಿಗಿದು ಹಿಂದಕೆ ಜಾರಿ ಜುಣುಗಿದ ಕೋಲೆ 18
ಹಿಂದಣ ಬೆಳೆಮಣ್ಣ ಕೂಡಿತು ಕುಳಿಯಲಿ
ಮುಂದಣ ದುದುರಿತು ಹಣ್ಣಾಗಿ ಕೋಲೆ 19
ಕೆಳಗು ಮೇಲಕು ದಂಡು ಬಳಪ್ರಾಂತ ದೊಳುದಂಡು
ನೆಲೆಗೊಂಡು ಜನರು ತಲ್ಲಣಿಪರು ಕೋಲೆ 20
ಸುಬ್ಬರಾಯನ ವೀರಭದ್ರನ ಪ್ರಸಾದ
ಸರ್ವಜನರ ಬಾಯ್ಗೆ ಬಿತ್ತಣ್ಣ ಕೋಲೆ 21
ನರರೂಪ ಧರಿಸಿ ಲಕ್ಷ್ಮೀಶನು ಹೊಯ್ಸೂವ ಕೋಲೆ 22

ರಾಮನ ನೋಡಿದೆ ರಘುಕುಲ ತಿಲಕನ
ಕಾಯ ಕೌಸಲ್ಯ ತನಯನ ಪ
ತಾಮಸ ದೈತ್ಯರ ಲೀಲೆಯಲಿ ಕೊಂದು
ಭೂಮಿ ಭಾರವನಿಳುಹಿದ ನಿಸ್ಸೀಮನಅ.ಪ.
ತಾಟಕಾದಿಗಳ ಘೋರಾಟವಿಯಲಿ
ಪಾಟುಪಡಿಸಿದ ಹಾಟಕಾಂಬರನ
ತೋಟಿಗೊದಗಿದ ಮಾರೀಚಾದಿಗಳ
ಆಟನಾಡಿಸಿದ ನೀಟುಗಾರ 1
ಹಲವು ಕಾಲದಿ ಶಿಲೆಯಾಗಿರ್ದ
ಲಲನೆ ಅಹಲ್ಯೆಯ ಶಾಪವ ಹರಿಸಿ
ಕಲುಷವ ಕಳೆಯುತ ಕುಲಸತಿ ಮಾಡಿದ
ನಳಿನ ನಯನನ 2
ಹರನ ಧನುವನು ಸ್ಮರನ ಧನುವಿನಂತೆ
ತ್ವರದಿ ಮುರಿದು ನಿಂದ ಸುಕುಮಾರನ
ಧರಣಿಪ ಜನಕನ ಭಕ್ತಿಗೆ ಒಲಿದು
ಧರಣಿಜೆಯ ವರಿಸಿ ಹರುಷವಿತ್ತನ 3
ತಾತನ ಭಾಷೆಯ ಪ್ರೀತಿಯಿಂ ಸಲಿಸೆ
ಸೀತೆ ಸಹಿತ ಭ್ರಾತ ಲಕ್ಷ್ಮಣವೆರಸಿ
ಆತುರದಿಂದಲಿ ಅರಣ್ಯವನೈದಿ
ಕೌತುಕ ತೋರುತ ಚರಿಸಿದವನ4
ಖರದೂಷಣ ತ್ರಿಶಿರಾದಿ ರಕ್ಕಸರ
ಅರೆಕ್ಷಣದಲಿ ತರಿದು ಬಿಸುಟವನ
ಹಿರಣ್ಯಮೃಗವ ಬೆನ್ನಟ್ಟಿ ಕೆಡಹುತ
ವರ ಜಟಾಯು ಶಬರಿಗೆ ಒಲಿದವನ 5
ವಾತಸುತನ ಕಂಡಾತನ ಪದುಳಿಸಿ
ತರಣಿ ಸುತಗೆ ಅಭಯವನಿತ್ತ
ಜಾತವೇದನೆದುರಲಿ ಸಖ್ಯವ ಮಾಡಿ
ಘಾತಕ ವಾಲಿಯ ನಿಗ್ರಹಿಸಿದನ 6
ಕೋತಿ ಕರಡಿಗಳ ಹಿಂಡನು ಕೂಡಿಸಿ
ಸೇತುವೆಗಟ್ಟಿಸಿ ಜಲಧಿಯ ದಾಟಿ
ಪಾತಕಿ ರಾವಣನÀ ಶಿರಗಳ ಕಡಿದು
ಸೀತೆಯ ಸೆರೆಯನು ಬಿಡಿಸಿದಾತನ 7
ಮೊರೆಯನು ಪೊಕ್ಕಾ ವರ ಭೀಷಣನ
ಕರುಣದಿ ಕರೆದು ಕರವನು ಪಿಡಿದು
ಧರೆಯಿದು ಸ್ಥಿರವಾಗಿರುವ ಪರಿಯಂತ
ದೊರೆತನ ಮಾಡೆಂದ್ಹರಸಿದಾತನ 8
ಅಕ್ಕರೆಯಿಂದಲಿ ಅರ್ಚಿಸುವರಿಗೆ
ತಕ್ಕಂತೆ ವರಂಗಳ ನೀಡುತಲಿ
ಮಿಕ್ಕು ರಾಜಿಸುತಿಹ ಪಂಪಾಪುರದ
ಚಕ್ರತೀರ್ಥದಿ ನೆಲೆಸಿಹನ 9
ಕಂತುವೈರಿ ವಿರುಪಾಕ್ಷಗೆ ತಾರಕ
ಮಂತ್ರ ನಾಮಕನಾಗಿರುತಿರ್ಪನ
ಯಂತ್ರೋದ್ಧಾರನಾಗಿರುವ ಹನುಮನ
ಮಂತ್ರಿಯ ಮಾಡಿಕೊಂಡು ರಾಜಿಪನ 10
ದುಷ್ಟ ರಕ್ಕಸ ದಮನವ ಮಾಡಿ
ಶಿಷ್ಟ ಜನರುಗಳಿಷ್ಟವ ಸಲಿಸುತ
ಶ್ರಿಷ್ಟಿಗೊಡೆಯನೆನಿಸಿ ಮೆರೆಯುತಲಿರುವ
ದಿಟ್ಟ ಶ್ರೀ ರಂಗೇಶವಿಠಲನ 11