ಕಾಡದೆ ಬೇಡದೆ ಕಂಗೆಡದೆ ಕೋ ಮನವೆ ನಿಜ ಸುಭಿಕ್ಷ
ಗುರು ಸಂರಕ್ಷ ಧ್ರುವ
ಅಳುಕದೆ ಬಳುಕದೆ ತುಳುಕದೆ ನಿಂದು ತಿಳಕೊ ನಿಜಸುಭಿಕ್ಷೆ
ಕೊಳಕ ಹುಳಕ ಮೊಳಕನೆಂದು ಮಾಡದಿರುಪೇಕ್ಷ
ನಾಳೆ ನಾಡದಿಂದ್ಯಾಗೆಂದು ಕಲ್ಪಿಸಿಕೊಬ್ಯಾಡಪೇಕ್ಷ 1
ಲಜ್ಜೆ ಅಳಿದು ಗುರು ಶರಣವ ಹೊಕ್ಕು ಸರಕ್ಕನೆ ಕೋ ಸುಭಿಕ್ಷೆ
ಹೆಜ್ಜೆಜ್ಜಿಗೆ ಸುರಿಮಳೆಗರೆವುತಲದೆ ಗುರುಕರುಣದಕಟಾಕ್ಷ
ಫಜ್ಜಿಗೆ ಬಂದುವರಿತ ಮ್ಯಾಲೆ ಕಂಜನಾಭನೆ ಸುಪಕ್ಷ 2
ಬೇಡಿಸಿಕೊಳ್ಳದೆ ನೀಡುತಲಾನೆ ಭಾಸ್ಕರ ಗುರು ಸಮರ್ಥ
ನೀಡಿ ನಿಜನಿಧಾನವ ಕೊಟ್ಟು ಮಾಡುತಲಾನೆ ಹಿತಾರ್ಥ
ಬಡವರಾಧಾರೆನ್ನೊಡೆಯನೆ ಜಗತ್ರಯಕ್ಕೊಬ್ಬನೆ ಕರ್ತ
ಮೂಢ ಮಹಿಪತಿಗನುದಿನ ಬಿಡದೆ ನೀಡುತಾನೆ ಸಕಲಾರ್ಥ 3

ಭಕ್ತಿನೋಡಿ ಜನ ಮಾಡುವ ಪರಿಯ ಮುಕ್ತಿಯ ಮಾರ್ಗವ
ಯುಕ್ತಿಯನರಿಯದೆ ಭಕ್ತ ನಾನೆಂದಾಡುವರ್ಹೊರಿಯ ಧ್ರುವ
ಚಕ್ಕಮಲಕು ಭಕ್ತಿಯ ನೋಡಿ
ಉಕ್ಕಿ ದೋರುತಲ್ಯದ ಬಲಗೂಡಿ
ಮಿಕ್ಕ ಮಾನವರಿಗೆ ದಯಮಾಡಿ 1
ಡಂಭದೋರು ವನೇಕಚಂದ
ಗುಂಭಹೇಳನು ಸರಕ್ಕನೆ ಬಂದು
ಕೊಂಬುಕೊಡುವ ಮಾತಿಗೆ ಬಂದರೆ
ನಂಬದೆ ಹೋಗುವರತ್ತತ್ತ ಹಿಂದ 2
ಹೊಟ್ಟಿನಮ್ಯಾಲೆ ಸಾರಿಸಿದಂತೆ
ನಿಷ್ಠೆನೋಡಿ ಜನ ಮೋಹಿಸುವಂತೆ
ಘಟ್ಟಿಸುತ ತಮ್ಮ ಹೊಟ್ಟೆಯ ಹೊರೆದರು
ಮುಟ್ಟ ಭಜಿಸುವ ಗುಟ್ಟುದೋರಿದಂತೆ3
ರಚ್ಚಿಗೆ ಬಂತು ಭಕ್ತಿ ಇದೇ ಬಹಳ
ಹೆಚ್ಚು ನಮ್ಮದೆಂದು ಮಾಡುರು ಮ್ಯಾಳಿ
ಮತ್ಸರದೊಳಗಿದ್ದು ಸಚಲಸ್ನಾನ
ಮಾಡಿದೆವೆಂದು ಹೇಳುರು ನಿರ್ಮಲ4
ನಗೆ ಬರುತ್ತದೆ ಭಕ್ತಿಯ ಕಂಡು
ಜಗದೊಳಗೆಲ್ಲ ಇದೇವೆ ಭಂಡು
ಸುಗಮ ಸುಪಥ ಬ್ಯಾರದೆ ಎಂದು
ಮಹಿಪತಿ ಘನಬೆರೆದು ಸದ್ಗುರು ಬಲಗೊಂಡು 5

ಸದ್ಗುರು ಭಕ್ತಿ ಲೇಸು ಲೇಸು
ಸದ್ಭಕ್ತಿಗೊಂದು ಗುರುಕೃಪೆಯೆ ಲೇಸು ಧ್ರುವ
ಒಂದೆ ಸುಪಥ ಲೇಸು
ಹೊಂದಿ ಬಾಳುವದು ಲೇಸು
ಪಾದ ಕಾಂಬುವದೆ ಲೇಸು 1
ನಡೆ ನುಡಿ ಒಂದೆ ಲೇಸು
ದೃಢಭಾವನೆಯು ಲೇಸು
ಪಿಡಿಯುವನು ಸಂಧಾನಧ್ಯಾತ್ಮದ ಲೇಸು 2
ಗುರುದೈವೆಂಬುದೆ ಲೇಸು
ಅರಿತು ಬೆರೆವುದು ಲೇಸು
ಸರಕ್ಕನೆ ಸಾಧಿಸಿಕೊಂಬಾನುಭವ ಲೇಸು 3
ಒಳಮುಖನಾಗುವದೆ ಲೇಸು
ತಿಳಿಯುವಾತನ ಮನ ಲೇಸು
ಬೆಳಗಿನೊಳಿಹ್ಯ ಬೆಳಗು ಹೊಳೆವ ಲೇಸು 4
ತನ್ನ ತಾ ತಿಳಿವದೆ ಲೇಸು
ಉನ್ಮನವಾಗುದೆ ಲೇಸು
ಪಾದ ನಂಬುದೆ ಲೇಸು 5
ಅರ್ತರೆ ಗುರುವಾಕ್ಯ ಲೇಸು
ಬೆರ್ತರೆ ಗುರುಪಾದ ಲೇಸು
ನಿರ್ತದಿಂದಾಗುವ ಪೂರ್ಣ ಗುರ್ತವೆ ಲೇಸು 6
ಗುರುಶರಣ್ಹೋಗುದೇ ಲೇಸು
ಕರುಣ ಪಡೆವದೆ ಲೇಸು
ತರಳ ಮಹಿಪತಿಗಿದೆ ಸುಖವೆ ಲೇಸು 7