ನೀನೆ ಗತಿ ಎನಗಿನ್ನು ಕರುಣಿಸು ಮಾಧವ
ದೀನನ ಮರೆಯದಿರು ಸಿರಿಯರ ಜೀವ ಪ
ನೀನೆ ಕರುಣಾಳು ಭಕ್ತಜನರಭಿಮಾನಿ
ನೀನೆನ್ನ ಬಿಟ್ಟ ಬಳಿಕ ಕಾಮಿತವ ಪೂರೈಸಿ
ಕಾಯ್ವರಕಾಣೆನಾರನು ಕಮಲನಾಭ ಅ.ಪ
ಎಡಬಿಡದೆನ್ನನು ಕಾಡುತಿರುವ ಅತಿ
ಜಡಭವ ಕಡುದು:ಖ ತಡಿಲಾರೆನಭವ
ಅಡರಿಕೊಂಡೆನ್ನ ಸುಡುತಲಿರುವ
ಒಡಲತಾಪ ಗಡನೆ ಬಿಡಿಸಿ
ಬಿಡದೆ ಎನ್ನನು ಪಿಡಿದು ರಕ್ಷಿಸು
ಮಡದಿಗಕ್ಷಯದುಡುಪು ಇತ್ತನೆ 1
ಶರಧಿಸಂಸಾರದ ಉರುತರ ಪರಿಬಾಧೆ
ಕಿರಿಕಿರಿ ಪರಿಹರಿಸಿ ಪೊರೆಯಯ್ಯ ಜವದಿ
ಶರಣುಮಾಡುವೆ ಶರಣಜನರ
ಕರುಣಮಂದಿರ ಮರೆಯದಿರೆಲೊ
ತರಳ ನಿರುತದಿ ಚರಣಸ್ಮರಿಸಿ
ಕರೆಯೆ ಕಂಬದಿ ಭರದಿ ಬಂದನೆ 2
ಮುಂದೆನಗೆ ಭವಬಂಧ ಎಂ
ದೆಂದಿಗಿಲ್ಲದಂತೆ ತಂದೆ ಕರುಣಿಸು ದಯಾ
ಸಿಂಧು ಶ್ರೀರಾಮ ವಂದಿ ಭಜಿಸುವೆ
ಮಂದರಾದ್ರಿ ಮಂದಿರನೆ ತ್ವರ
ಬಂದು ಕಾಯೊ ಬಂಧನದಿ ಜಗ
ತಂದೆ ನಿಮ್ಮ ಪಾದಕೆಂದು ಪೂವಗೆ (?) ಬಂದು ಪೊರೆದನೆ 3

ನೋಡು ಎನ್ನೊಳು ಮಾಡು ದಯವನು
ಬೇಡಿಕೊಂಬುವೆ ಮುರಹರ ಪ
ರೂಢಿಯೊಳು ಎನ್ನ ಖೋಡಿಮಾಡದೆ ಕಾ
ಪಾಡು ಬೇಗ ಭಕ್ತಹಿತಕರ ಅ.ಪ
ಪಂಕಜಾಕ್ಷನೆ ಕಿಂಕರನ ಈ
ಮಂಕುಗುಣಗಳ ಬಿಡಿಸಯ್ಯ
ಶಂಖಸುರಹರ ಶಂಕೆಯಾತಕೆ
ಕಿಂಕರನು ನಾಂ ಪಿಡಿ ಕೈಯ 1
ಹಿಂದು ಇಲ್ಲೆನ್ನ ಮುಂದು ಇಲ್ಲಯ್ಯ
ತಂದೆ ನಿನ್ಹೊರತ್ಯಾರ್ಯಾರು
ಮಂದಮತಿಯನು ಛಿಂದಿಸಿ ಬೇಗ
ಕಂದನನು ಪೊರೆ ದಯಾಕರ 2
ತಂದೆ ನೀನೆ ತಾಯಿ ನೀನೆ
ಬಂಧು ನೀನೆ ಶ್ರೀಕರ
ಬಂದ ದುರಿತದಿಂದ ಕಾಯೊ
ಸಿಂಧು ನೀನೆ ದೇವರೊ 3
ಉರಗನ ಬಾಯಲಿರುವ ಮಂಡೂಕ
ಸ್ಮರಿಸಿ ನೋಣಕ್ಹವಣಿಸುವ ತೆರದಿ
ಶರಧಿಸಂಸಾರ ಸ್ಥಿರವೆಂದರಿಯದೆ
ಮರವಿನಿಂ ಬಿದ್ದೆ ದುರಿತದಿ 4
ಕಾಯಜೆಂಬುವ ಮಾಯಕೋರನು
ಪಾಯಕೆ ಒಳಪಟ್ಟೆನು
ತೋಯಜಾಕ್ಷೇರ ಮಾಯಮೋಹದಿ
ಕಾಯದಂದಿಸಿ ಕೆಟ್ಟೆನು 5
ಕುಂಭಿನಿಯೊಳೆನಗಿಂಬುಗೊಟ್ಟು ಬಲು
ನಂಬಿದವರಾಸ್ತ್ಯಳಿದೆನೊ
ಜಂಬಬಡಿಯುತ ಶುಂಭಗುಣಗಳಿ
ಗಿಂಬುಗೊಟ್ಟು ದಿನಗಳೆದೆನೊ 6
ಪ್ರಾಣತಗ್ಗಿಸಿ ದೀನತನದಲಿ
ದೈನ್ಯಬಡುವರಿಗ್ಹಾನಿಮಾಡಿದೆ
ದಾನಕೊಡುವರ ದಾನಕಡ್ಡಾಗಿ
ನಾನಾ ದುರ್ಬೋಧವುಸುರಿದೆ 7
ಜಾನಕೀಶನ ಧ್ಯಾನಯುತರಿಗೆ
ಹೀನ ಹಾಸ್ಯವ ಗೈದೆನೊ
ಏನು ತಿಳಿಯದೆ ಗಾಣಕೆ ಬಿದ್ದ
ಮೀನಿನಂತೆ ನಾನಾದೆನೊ 8
ಶ್ವಾನನಂದದಿ ಖೂನವಿಲ್ಲದೆ
ನಾನಾಪಾಪವ ಗೈದೆನೊ
ಮಾನವಜನುಮೇನು ಶ್ರೇಷ್ಠಿದ
ಜ್ಞಾನದೋಳ್ಹೊತ್ತುಗಳೆದೆನೊ9
ಮಂಗನಂದದಿ ಹಂಗದೊರೆದು
ಅಂಗಲಾಚಿ ಪರರನ್ನು ಬೇಡಿದೆ
ಅಂಗಜಪಿತ ಮಂಗಳಾಂಗ ಶ್ರೀ
ರಂಗ ನಿಮ್ಮ ಮಹಿಮ್ಯರಿಯದೆ 10
ದಾಸ ಮಾಡಿದ ದೋಷ ಮನ್ನಿಸಿ
ಪೋಷಿಸು ಶ್ರೀರಾಮನೆ
ಶ್ರೀಶ ಶ್ರೀನಿವಾಸ ಎನ್ನಂತ
ರಾಸೆ ಪೂರೈಸು ಬೇಗನೆ 11

ಸಂತಸ ಕೊಡು ದೇವ ಈ ಮನಕೆ
ಕಂತುಪಿತ ನಿಮ್ಮ ಧ್ಯಾನೆನ್ನಂತರಂಗಕ್ಕೆ ಇತ್ತು ಪ
ಪರಮಪುರುಷ ತವ ಚರಣಸೇವೆಯ ನೀಡಿ
ಪರಿಭವ ದು:ಖವ ಪರಿಹರಿಸಭವ1
ಶರಧಿಸಂಸಾರ ಸ್ಥಿರಮಾಯಕಾರ
ತ್ವರಿದದಿಂದೆನ್ನೊಳು ಕರುಣವ ತೋರೊ 2
ದೋಷದೂರನೆ ಎನ್ನ ದೋಷ ವಿನಾಶಿನಿ
ಶ್ರೀಶ ಶ್ರೀರಾಮ ನಿನ್ನ ದಾಸನೆನಿಸೊ ಎನ್ನ 3