ಮಂಗಳಂ ಜಯ ಮಂಗಳಂ
ಮಂಗಳಂ ಬೆಟ್ಟದೊಡೆಯ ಹರಿಗೆ ಜಯ ಪ.
ಮಂಗಳಂ ಕೊಳಲನೂದುವ ದೊರೆಗೆ
ಮಂಗಳಂ ಶ್ರೀ ಶ್ರೀನಿವಾಸ ವೆಂಕಟನಿಗೆ
ಮಂಗಳಂ ಶೇಷಾಚಲ ಹರಿಗೆ ಅ.ಪ.
ವೈಕುಂಠದಲಿ ಬಂದವಗೆ
ಆ ಕೋಲಗಿರಿಯಲಿ ನಿಂದವಗೆ
ತಾ ಕಾಸುಕಾಸಿಗೆ ಬಡ್ಡಿಯ ಕೊಳುತಲಿ
ಬೇಕಾದ ವರಗಳ ಕೊಡುವನಿಗೆ 1
ಬುತ್ತಿ ಪೊಂಗಲುಗಳ ಮಾರುವಗೆ
ಮತ್ತೆ ದರ್ಶನ ಕೊಡದೆ ಒದೆಸುವಗೆ
ನಿತ್ಯ ಸ್ವಾಮಿಪುಷ್ಕರಣಿ ತೀರದಿ ನಿಂತು
ಭೃತ್ಯವರ್ಗಗಳನು ಪೊರೆವವಗೆ 2
ಶಂಖ ಚಕ್ರ ವರ ಹಸ್ತನಿಗೆ
ಶಂಕೆಯಿಲ್ಲದೆ ಅಭಯ ಕೊಡುವನಿಗೆ
ಶಂಕರಮಿತ್ರಗೆ ಪರಮಪವಿತ್ರಗೆ
ಸಂಕೋಲೆ ಹನುಮಗ್ಹಾಕಿಸಿದವಗೆ 3
ವೃಂದಾವನದಲಿ ಮೆರೆದವಗೆ
ಮಂದಗಮನೆಯರ ಮೋಹಿಪಗೆ
ಚಂದದ ಪೊಂಗೊಳಲೂದಿ ಗೋಪಿಯರ ಕಾಯ್ದ
ಗೋಪಿ ಕಂದನಿಗೆ 4
ನಾಗರಾಜನ ಗಿರಿ ನಿಲಯನಿಗೆ
ಯೋಗಿಗಳಿಗೆ ನಿಲುಕದ ಹರಿಗೆ
ಸಾಗರನಿಲಯ ಗೋಪಾಲಕೃಷ್ಣವಿಠ್ಠಲ
ಭೋಗಿಶಯನ ಲಕ್ಷ್ಮೀಪತಿಗೆ 5