ಬಂದೆಯಾ ಬಂಧುವೆ ಭಾಗ್ಯದ ನಿಧಿಯೆ
ಮಂದರದರ ನಿನ್ನ ಮಂದಿರಕ್ಕೆ ಪ
ತಂದೆಯ ಮಮ ಹೃನ್ಮಂದಿರಕಾಗಲೇ
ಬಂದೆಯೊ ಕರುಣಾಸಿಂಧುವೆ ಸ್ವಾಮಿ ಅ.ಪ
ಆಗಮನುತ ನಿನ್ನಾಗಮನದಿ ಇನ್ನು
ನೀಗಿತು ಚಿಂತೆಯು ನೀರಜನಯನ
ಯಾಗ ಸಾಫಲ್ಯಕೆ ಸೂಚನೆಯಿದು ಮಹಾ
ಭಾಗವತ ಪ್ರಿಯ 1
ಮುಂದಿನ ಕಾರ್ಯವ ನೀನೆ ವಹಿಪುದು
ಎಂದೆಂದಿಗೂ ನೀನೆ ಗತಿಯು
ನಂದನಂದನ ಗೋವಿಂದ ಮುಕುಂದನೆ
ನಿಂದಿರಿಸಯ್ಯಾ ನಿನ್ನಾಜ್ಞೆಯಲೆಮ್ಮನು 2
ನಾಗಶಯನ ನಳಿನಾಯತ ಲೋಚನ
ಯೋಗಿನಿಲಯ ಕಮಲಾಲಯವಾಸ
ಯಾಗರಕ್ಷಕನೆ ಯಾಗ ಫಲಪ್ರದ
ಬಾಗುವೆ ಚರಣಕೆ ಕರಿಗಿರೀಶನೆ 3