ನಳಿನನಾಭ ಸುಂದರ ಸುಗುಣಾಕರ ಕಮಲೇಶ ಜಗದೀಶ ಪ
ಚಲಿಸಬಲ್ಲರೇ ನಿನ್ನ ಬಲವಿಲ್ಲದಿರಲು ಸಕಲ ಸುರನರರು ಅ.ಪ
ಬ್ರಹ್ಮಾದಿಗಳು ನಿನ್ನ ಸಮ್ಮತಿಯಲಿ ಈ
ಬ್ರಹ್ಮಾಂಡದಲಿ ತಮ್ಮ
ಕರ್ಮರಚಿಸಿ ನಿನ್ನ ಮರ್ಮವನರಿಯಲು
ತಮ್ಮ ಕಾಲವ ಕಳೆಯುವರು 1
ಅಜ್ಞಾನದೂರನೆ ಸುಜ್ಞಾನ ಮೂರುತಿ
ಯಜ್ಞನಾಮಕ ಪರಮಾತ್ಮ ನಿನ್ನ
ಜಿಜ್ಞಾಸದಿಂ ಸುಪ್ರಜ್ಞೆಯ ಪೊಂದದ
ಅಜ್ಞಾನಿ ಇದನರಿಯುವನೇ 2
ಸರ್ವತ್ರ ವ್ಯಾಪ್ತನೆ ಸರ್ವಾಗಮಾರ್ಥನೆ
ಸರ್ವ ಪ್ರೇರಕ ಸರ್ವೇಶ
ಗರ್ವ ತೊರೆದು ನೀನೋರ್ವ ಸ್ವತಂತ್ರನೆಂ
ದರಿವ ಜನಕೆ ಸುಪ್ರಸನ್ನ 3