ತ್ವರಿತದಿ ಬಾರೆ ಸಖಿ ಸುನೇತ್ರೆ |
ಹರುಷದಿ ಪೀಠಕೆ ಮಂಗಳಗೀತೆ ಪ
ಮಿನುಗುವ ನಯನಾ ಕನಕಾಭರಣಾ |
ಮಣಿಮುತ್ತಿನ ವನಮಾಲೆಯು ಧರಿಸುತ 1
ರತ್ನದಹಾರ ದಿವ್ಯಾಂಬರದಿ | ಮಿತ್ರಿ
ನೀಶೋಭಿಸುತ ಪೀಠಕೆ ಮುದದಿ 2
ಕೋಮಲೆ ಬಾಲೆ ಸುಶೀಲೆ
ಶಾಮಸುಂದರನ ನಾಮವ ಪಾಡುತ 3

ಮಂಗಳಂ ಶ್ರೀ ಲಕ್ಷ್ಮೀದೇವಿಗೆ ಜಯ
ಮಂಗಳಂ ಪಕ್ಷಿವಾಹನರಾಣಿಗೆ ಪ.
ಮಂಗಳಂ ಮಂತ್ರಮೂರುತಿಗೆ ಶುಭ
ಮಂಗಳಂ ಪರತಂತ್ರರೂಪಿಣಿಗೆ ಅ.ಪ.
ಭಾರ್ಗವಿಗೆ ಭಾಗ್ಯದಾಯಿನಿಗೆ
ಭಾಗವತರ ಪೂಜೆ ಕೈಗೊಂಬಳಿಗೆ
ನಾಗವೇಣಿಗೆ ವರನಾಗಪೂಜಿತೆಗೆ ವರ
ಭೋಗಿಭೂಷಣಸುತೆ ಯೋಗೇಶ್ವರಿಗೆ 1
ಸೀತೆಗೆ ಮಂಗಳಗೀತೆಗೆ ಭುವಿ
ಜಾತೆಗೆ ಮಂಗಳಂ ಪವನಜಸೇವಿತೆಗೆ
ಮಾತೆಗೆ ಸದ್ಗುಣ ಪೂತೆಗೆ ವರಪ್ರ
ದಾತೆಗೆ ನಿತ್ಯನಿರ್ಮಲೆಗೆ 2
ವರಶೇಷಗಿರಿವರನ ಉರದಲ್ಲಿ ನೆಲೆಗೊಂಡು
ಶರಣಾಗತರಂ ಪರಿಭಾವಿಸಿ
ಪರತರ ಸುಖಸೌಭಾಗ್ಯವ ಕರುಣಿಸಿ
ಪೊರೆವ ಕಾರುಣ್ಯಮೂರುತಿಗೆ 3