ಎತ್ತಣದನಿಯಿದು ಎತ್ತಣ ಮಧುರವ
ಚಿತ್ತಾಕರ್ಷಕ ಬಾನುಲಿಯೇ ಪ
ಮತ್ತ ಭೃಂಗಾಳಿಯ ಝೇಂಕೃತಿ ಶ್ರುತಿಯು
ಸುತ್ತ ಮಯೂರದ ನಾಟ್ಯದ ನಲವೋ ಅ.ಪ
ಏಣಲೋಚನೆಯರ ಕಾಂಚನ ಕಿರುಗೆಜ್ಜೆ
ವೀಣಾನಾದವ ಅಣಕಿಪುದು
ತಾಣವದೆಲ್ಲಿಯೋ ಕಾಣಿರೆ ಸಖಿಯರೇ
ವೇಣು ಗೋಪಾಲನ ನಾಟ್ಯವಿದಲ್ತೇ 1
ಅಲ್ಲಿ ನೋಡೇ ತಂಗಿ ಬಾನೆಡೆಯಿಂದಲಿ
ಮಲ್ಲಿಗೆ ಪೂಮಳೆ ಸುರಿಯುತಿದೆ
ನಲ್ಲೆಯರಿಂಚರ ಸರಿಗಮಪದನಿಯು
ಎಲ್ಲ ರಾಗಗಳಲಿ ನಲಿಯುತಲಿಹುದು 2
ಅಂಗನೆಯರೆ ನಮ್ಮ ಗೆಜ್ಜೆಯ ಝಣರವ
ಮಂಗಳಗಾನಕೆ ಇಂಬಿರಲಿ
ಹೊಂಗೊಳಲೂದುವ ಚಿನ್ಮಯ ಮಾಂಗಿರಿ
ರಂಗನ ದರ್ಶನ ಮಾಡುವ ಬನ್ನಿ3

ಬಾರೈ ನಂದನ ಕಂದನೆ ನೀರಜನೇತ್ರ ಪ
ನೀಲಮಣಿ ಮಂಟಪದ ಮೇಲೆ ಮಾಣಿಕ್ಯಕಲಶ
ಜಾಲು ಜಲ್ಲರಿ ರತ್ನ ನೀಲಪೀಠಕೆ ನೀ 1
ಮುತ್ತಿನಾಕ್ಷತೆಗಳ ನೆತ್ತಿಯಲಿಡುವೋಲು
ಸುತ್ತಭೂಸುರರೆಲ್ಲರಸುತ್ತ ಬಾರೆನ್ನುವರು 2
ಶೃಂಗಾರಶೀಲನೆ ಸಂಗೀತಲೋಲನೆ
ರಂಗನಾಯಕಿಸಹಿತ ತುಂಗಪೀಠಕೆ ನೀ 3
ಅಂಗನೆಯರು ಕೂಡಿ ಮಂಗಳಗಾನ ಪಾಡಿ
ರಂಗ ಬಾರೆನ್ನುವರು ಮಾಂಗಿರಿನಿಲಯ4

ಮಂಗಳಗಾನ ವಿಲೋಲಾ | ಮುನಿಪಾಲಾ ಫಣಿಮಾಲಾ
ಮುನಿಪಾಲಾ ಫಣಿಮಾಲಾನಂತ ಶೀಲಾನಂತ ಶೀಲಾ ಪ
ಕುಲಿಶ ಧರಾರ್ಚಿತ
ಯಲರುಣಿ ತಲ್ಪಸುಶಯನ | ಸುಶಯನಾ
ಶಶಿವದನಾ ವಿಪಗಮನಾ 1
ಘುನಗುಣನಿಧಿ ವನಜಾಸನ ಜನಕಾ
ದಿವಕೋಟ ಪ್ರಕಾಶ ಅಘುನಾಶ
ಜಗದೀಶಾ ಜಗದೀಶಾ ಶ್ರೀನಿವಾಸಾ 2
ಸಾಮಜ ಭಯಹರ ರಾಮ ಶ್ರೀರಾಮಾ
ಶಾಮಸುಂದರ ರಘುವೀರಾ ಭವದೂರ
ಮುರಹರಾ ಮುರಹರಾ ಸುಕುಮಾರ 3

ಸುಲಲಿತ ಮಧುಕರ ಕೊಳಲನೂದುವುದನು
ಕಲಿಸಿದರಾರೇ ನಳಿನಮುಖೀ ರಾಧೇ ಪ
ಬಲಿಸಂಹಾರನು ಲೋಕದ ನಾರಿಯ
ರಲಸದೆ ಗಾನವ ಕಲಿಸಿದನೇನೇ ಅ.ಪ
ಕರು ತುರುಗಳ ಬಳಿ ಸರಸವನಾಡುತ
ಮುರಳಿಯನೂದುವ ಸರಸಿಜನಾಭ
ಕರೆಕರೆದು ನಿನ್ನ ಬೆರಳಿಗುಂಗುರವಿಟ್ಟು
ಸ್ವರಗಳ ಬೋಧಿಸಿ ನಲಿನಲಿದಿಹನೇನೇ 1
ಬೃಂದಾವನದಲಿ ನಂದಕುಮಾರನ
ವಂದಿಸೆ ನಾರದ ಬಂದುಹಾಡಿದನೇ
ಅಂದದ ಕಲಿಕೆಯ ತುಂಬುರ ನಿನಗಾ
ನಂದದಿ ಗಾನವ ಕಲಿಸಿದನೇನೆ 2
ಅಂಗಜಪಿತನಿಗೆ ಮಂಗಳಗಾನವ
ಅಂಗನೆ ಶಾರದೆ ಪಾಡಿದಳೇನೇ
ಮಾಂಗಿರಿರಂಗ ಮಾತಂಗವರದನಂತ
ರಂಗದರಾಣಿ ನೀ ಕಲಿಯೆಂದನೇನೇ 3