ಬಂತವ್ವಾ ತಂಗಿ ಬಂತವ್ವಾ ಈ
ಗೊಂದು ಮಾತು ನೆನಪು ಬಂತವ್ವಾ ಪ
ಅಂತರಂಗದೊಳು ಕಂತುಜನಕ ತನ್ನ
ಚಿಂತಿಪರ್ಹಂತೆಲಿ ನಿಂತಿಹ್ಯನಂತೆ ಅ.ಪ
ಮರುಳು ಬುದ್ಧಿಯನು ನೀಗವ್ವ
ಬರೆ ತಿರುತಿರುಗಿ ಮರುಗಬೇಡವ್ವ
ಕರಿರಾಜ ದ್ವರದನು ತರುಣಿಯ ಪೊರೆದನು
ಸರಸದಿ ಪಾಂಡವರ ನೆರಳಾಗಿ ನಿಂತನು 1
ಹಂಚಿಕೆ ಪೇಳುವೆ ನಿನಗವ್ವ ನಿನ್ನ
ವಾಂಛಲ್ಯ ಗುಣವೊಂದು ಕಳೆಯವ್ವ
ಕಿಂಚಿತ್ತು ಮನದೊಳು ವಂಚನಿಲ್ಲದೆ ವಿ
ರಂಚಿಪಿತನ ನಂಬಿ ಭಜಿಸವ್ವ 2
ಸುಳ್ಳೆ ಕಳವಳಿಸುವುದ್ಯಾಕವ್ವ ತಿಳಿ
ನಳಿನಾಕ್ಷನ ಘನ ಮಹಿಮ್ಯವ್ವ
ಹೊಲಸು ದೇಹದಾಸೆ ನೀಗಿದ ಭಕ್ತಗೆ
ಸುಲಭನು ಶ್ರೀರಾಮ ಕೇಳವ್ವ 3

ಮರಗವ್ವ ತಂಗಿ ಮರಗವ್ವ
ದುರುಳ ಗುಣದ ಸವಿ ಸುರಿಯವ್ವ ಪ
ಪರಿಪರಿಯಿಂದಲಿ ಹರಿಹರಿಯೆನ್ನದೆ
ದುರಿತದುರುಲಿನೊಳು ಬಿದ್ದೆವ್ವ ಅ.ಪ
ಗುರುಹಿರಿಯರನು ಜರೆದೆವ್ವ
ಪರಿಪರಿ ಪಾಪ ಕಟ್ಟಿಕೊಂಡೆವ್ವ
ಹರಿಶರಣರ ಸೇವೆ ಅರಿಯವ್ವ
ಹರಿಹ್ಯಾಂಗೊಲಿತಾನು ನಿನಗವ್ವ 1
ಹಿಂದಿನ ಕರ್ಮದು ನೋಡವ್ವ
ಮುಂದೆ ಚಂದಾಗಿ ತಿಳಕೊಂಡುಳಿಯವ್ವ
ಮಂದರಧರ ಗೋವಿಂದನ ಮಾನಸ
ಮಂದಿರದೊಳಗಿಟ್ಟು ಭಜಿಸವ್ವ 2
ಗುರುವರ ಶ್ರೀರಾಮ ಚರಣವ್ವ ತಂಗಿ
ಅನುದಿನ ಸ್ಮರಿಸವ್ವ
ಶರಣ ಜನರ ಪ್ರಿಯ ಕರುಣಾಕರನು ನಿನ್ನ
ಪೊರೆಯದೆ ಎಂದಿಗೆ ಇರನವ್ವ3