ಚಿರಶಾಂತಿಯ ಪಡೆವುದಕೆ ಮನ ತ್ಯಾಗಮಾಡು ಜೀವಾ
ಮನವೇ ಭವಬಂಧನಕೆ ಘನಕಾರಣವೈ ಜೀವಾ ಪ
ತಿಳಿ ಈ ಮನದಾ ನಾಶಾ ಆದಾಗಲೆ ನಿಜಮುಕುತಿ
ಮನ ಮೋಕ್ಷದ ಸಾಧನವೈ ಅನುಮಾನಿಸದಿರು ಜೀವಾ 1
ಮನವಿಲ್ಲದ ಆ ಸ್ವರೂಪ ಅದು ತಾನೆ ನಿರ್ವಿಕಲ್ಪ
ಅದೆ ನಾನಿಹೆನೆಂದರಿಯೈ ಇದೆ ಮನದ ತ್ಯಾಗ ಜೀವಾ 2
ಪರಮ ಪದ ಆನಂದ ವೇದಾಂತದ ಘನಬೋಧಾ
ಗುರುಪುಂಗವ ಶಂಕರನಾ ಪರಮಾರ್ಥ ಬೋಧಸಾರ 3

ಪರಮಾತ್ಮನ ನೆನೆಯಲು ಬೇಕು
ಪರತರಸುಖವನು ಪಡೆಯುವನಿದರಿಂ
ದುರಿತಗಳೆಲ್ಲವ ನೀಗಲು ತಾ ಪ
ಮೊದಲನೆ ಕಾರ್ಯವು ಜೀವರೆಲ್ಲರಿಗೆ
ಇದು ಬಲು ಸುಲಭವು ಸಾಧನಗಳಲೀ
ಪದುಮನಾಭನನು ನೆನೆಯದಿರುವವ
ಅಧಮನು ಜಗದಿ ವ್ಯರ್ಥ ಜೀವಿಸುವ 1
ಎಲ್ಲ ವೇದಗಳು ಎಲ್ಲ ಶಾಸ್ತ್ರಗಳು
ಎಲ್ಲ ಸಾಧನೆಗಳು ಆತನ ಪ್ರಾಪ್ತಿಗೆ
ಬಲ್ಲವರಿಂದಲಿ ತಿಳಿದು ವಿಚಾರಿಸಿ
ನಿಲ್ಲದೆ ಸಾಧನೆ ಕೈಕೊಳ್ಳುವುದು 2
ಕೇಳುವದೈ ಪರಮಾತ್ಮನ ತತ್ವವ
ತಿಳಿವುದು ತನ್ನೊಳು ತಾನೇ ನಿರುತಾ
ಪೇಳಲೇನು ಧ್ಯಾನಿಸುವುದಾತನ
ಮೇಳವಿಸುವದೈ ಜೀವನ್ಮುಕುತಿ 3
ನಾರಾಯಣನೇ ಪರಮಗತಿಯು ಈ
ನರಜನ್ಮಕೆ ಬಂದಿರೆ ಲಾಭವಿದೇ
ಅರಿತು ಇದನು ತಾ ಸಾಧನೆ ಮಾಳ್ಪುದು
ಗುರುಶಂಕರನಾ ಬೋಧಸಾರವಿದು 4

ಪರಸುಖಕರಾ ಗುರುಬೋಧಸಾರಾ
ಮರಣಾ ಜರಾ ದುರಿತಾದಿ ದೂರಾ ಪ
ಜೀವಭಾವವಾ ಸಟೆಯಾಗಿ ಗೈವ
ದೇವಭಾವನಾ ಬಗೆಸಿನಿಲಿಸುವಾ
ಸಾವಿನಂಜಿಕೆ ದೂರಾಗಿ ಮಾಳ್ಪ
ಜೀವಂತಮುಕುತಿ ಕರದೀಯುವಾ 1
ದೃಶ್ಯವೆಂದು ತೋರ್ಪ ವಿಶ್ವತ್ಯಾಗ ಮಾಡಿ
ದೃಶ್ಯವಸ್ತುವಿಂದ ಬೇರೆನಿಸುವಾ
ಶಾಶ್ವತಾದ ಆ ಪದ ತೋರಿ ಮನದ
ಕಶ್ಮಲವನು ಕಳೆವ ಭವತಾರಕಾ 2
ಭೇದಭಾವವಾ ಛೇದಿಸುತ ಮನದಿ
ಬೋಧನಾರಾಯಣನ ಕೃಪೆ ಪೊಂದಿದಾ
ಬೋಧರೂಪ ಗುರುವು ಪೇಳಿರ್ದ ಬೋಧ
ಸಾಧು ಶಂಕರಾರ್ಯ ತಾನೆನ್ನುವಾ 3