ಸೋಜಿಗದಲಿ ಜೀವಿಸುವರು ಸುಜನರು ಪ
ಈ ಜಗದಲಿ ದುಷ್ಟ ಗೋಜಿಗೆ ಸಿಲುಕದೆ ಅ.ಪ
ಪರರ ವಿಭವಗಳಿಗೆ ಕರಗಲರಿಯರಿವರು
ಕೊರೆಯುವ ಬಡತನಕುರಿಯಲರಿಯರು
ಹರಿ ಕರುಣದಿ ತಮಗೆ ಸಿರಿಯು ಬಂದೊದಗಲು
ಪರಿಪರಿ ವಿಧದಲಿ ಮೆರೆಯದೆ ದೈನ್ಯದಿ 1
ಕೆಡುಕುತನಗಳನು ಅರಿಯರು ಈ ಜನ
ಬಡವರ ಸೌಖ್ಯಕೆ ದುಡಿವರು ಮುದದಲಿ
ಕಡುದುರುಳರು ನಿಂದೆ ನುಡಿಗಳಾಡುವರೆಂದು
ದುಡುಕದೆ ಅವರಲಿ ಕ್ಷಮೆಯ ತೋರುತ ಸದಾ 2
ಪರರಿಗುಪಕೃತಿಯಲರಿಯರು ಮಿತಿಯನು
ಪರರಿಗುಪಕೃತಿಗೆ ಜರಿಯರು ಮತಿಯನು
ಶರಣ ಪ್ರಸನ್ನನ ಕರುಣವ ಪೊಂದಲು
ವರನೀತಿಗಳಲಿ ನಿರತರಾಗುತ ಸದಾ 3