ಕಂಡೆನೆನ್ನ ದೊರೆಯ ಲಕುಮಿಯ | ಗಂಡನೆನಿಪ ಹರಿಯ ಪ
ಕುಂಡಲಿಶಯನನಿರುವ ಪರಿಯ | ಪದ
ಪುಂಡಲೀಕ ಸೇವಿಪ ಪರಿಯ ಅ.ಪ.
ಸಿರಿರಂಗ ಪುರಿಗೆ ಬಂದು | ವಿರಜಯೆನಿಪ
ವರ ಕಾವೇರಿಯೊಳು ಮಿಂದು
ನಿರುಪಮ ರಂಗಮಂದಿರದಿ ನಿಂದು | ನಮ್ಮ
ಸಿರಿ ರಂಗರಾಜನ ಕಂಡೆನಿಂದು 1
ಇಂದೆನ್ನ ಭಾಗ್ಯಕೆಣೆಯಿಲ್ಲ ಈ
ಮಂದಸ್ಮಿತನ ಕಂಡೆನಲ್ಲ
ಹಿಂದಿನ ಪುಣ್ಯ ಫಲಿಸಿತಲ್ಲ ಇನ್ನು
ಮುಂದಕೆ ಬಹು ಸಾಧನವಾಯಿತಲ್ಲ 2
ವಾಸುಕಿಶಯನನಾಗಿರುವ | ಬಲು
ಸೋಸಿನಿಂದ ಗರುಡನೇರಿ ಮೆರೆವ
ದೋಷರಾಶಿಗಳ ತರಿವ | ತನ್ನ
ದಾಸರ ಪ್ರೀತಿಯಲಿ ಪೊರೆವ 3
ಇಂದಿರೆ ರಮಣನಂದನ ಕಂದ | ತಾನು
ಇಂದೆನಗೆ ಒಲಿದು ದಯದಿಂದ
ಸಂದರುಶನವಿತ್ತು ಆನಂದಾಮಿಗೆ
ಪೊಂದಿಸಿ ದಾಟಿಸಿದ ಭವದಿಂದ4
ಸಂದು ಹೋದವಘಗಳೆಲ್ಲವೆಂದ | ಇನ್ನು
ಮುಂದೆನಗೆ ಭಯವಿಲ್ಲವೆಂದ
ಸುಂದರ ರಂಗೇಶವಿಠಲ ಬಂದ | ಮನ
ಮಂದಿರದಿ ನೆಲೆಯಾಗಿ ನಿಂದ 5