ಪವನಾಂತರ್ಗತ ಹರಿಯ ಸ್ಮರಣೆಯಮಾಡಿ ಪ
ವಿವಿಧ ಭಕುತರು ಕೂಡಿ ಹರುಷದಿ
ಪ್ಲವನಾಮ ಸಂವತ್ಸರದಲಿ
ಸವಿನಯದಿ ಭಜನೆಗಳ ಮಾಳ್ಪರು
ಹರಿಯ ಗುಣ ಕಾರ್ಯಗಳ ಸ್ಮರಣೆಯ ಅ.ಪ
ಪಕ್ಷಿವಾಹನ ಹರಿಯು ಶ್ರೀ ಲಕುಮಿದೇವಿಯ
ಲೆಕ್ಕಿಸದಿಹನಂತೆ ಹೀಗಿರಲು ಬ್ರಹ್ಮನ
ಪೊಕ್ಕುಳಲಿ ಪಡೆದನಂತೆ
ಸೊಕ್ಕಿದ ಅಸುರರನು ಬಡಿಯಲು
ಮಿಕ್ಕ ಸುರರನು ಪೊರೆಯಲೋಸುಗ
ರಕ್ಕಸಾಂತಕ ಹರುಷದಿಂದಲಿ
ಚೊಕ್ಕ ಸ್ತ್ರೀ ರೂಪಾದನಂತೆ 1
ಇಂದುಶೇಖರ ಕೇಳಿದ ಸ್ತ್ರೀರೂಪ ನೋಡಲು
ಬಂದು ಬೇಡಿದನಂತೆ ಅದು ಕೇಳಿ ಶ್ರೀಶನು
ಸುಂದರ ಸ್ತ್ರೀಯಾದನಂತೆ
ನಿಂದು ನೋಡುತ ಚಂದ್ರಶೇಖರ
ಮಂದಹಾಸದಿ ಪಿಡಿಪೋದನಂತೆ
ಮಂದಗಮನೆಯು ಸಿಗದೆ ದೂರದಿ
ನಿಂದು ಕಣ್ಮರೆಯಾದಳಂತೆ2
ವಿಸ್ಮಯವಾದನಂತೇ ಪಶುಪತಿಯ ಸಿರದಲಿ
ಹಸ್ತ ನೀಡಿದನಂತೇ
ಮತ್ತೆ ರಕ್ಷಕರಿಲ್ಲವೆಂದು
ತತ್ತರಿಸಿ ಭಯಪಟ್ಟನಂತೆ
ತಕ್ಷಣದಿ ಶ್ರೀ ಕಮಲನಾಭ
ವಿಠ್ಠಲ ರಕ್ಷಿಸಿ ಪೊರೆದನಂತೆ 3