ವನಜಾಕ್ಷ ಎನಗ್ಯಾಕೆ ಘನತರ ಅಪರಾಧ
ಎನಗೆ ಆಧೀನವೇನು ವಿಶ್ವವ್ಯಾಪಕ ನೀನೆ ಪ
ನಾ ನುಡಿವುದೆಲ್ಲ ನಿನ್ನ ನಿಜವಾದ ಮಂತ್ರವು
ನಾ ನಡೆವುದೆಲ್ಲ ನಿನ್ನ ಯಾತ್ರವೆಲೋ ದೇವನೆ
ನಾ ಬೇಡುವುದೆಲ್ಲ ನಿನ್ನ ವಿಮಲಾತ್ಮ ಪ್ರಸನ್ನತೆ
ನಾ ತೊಡುವುದೆಲ್ಲ ನಿನ್ನ ಪರಮಕೃಪಾಕವಚ 1
ನಾನುಂಬುವುದೆಲ್ಲ ನಿನ್ನ ಕರುಣ ಪ್ರಸಾದವು
ನಾ ಕುಡಿವುದೆಲ್ಲ ನಿನ್ನ ಚರಣ ಉದಕವಯ್ಯ
ನಾ ಬಯಸುವುದೆಲ್ಲ ನಿನ್ನ ಪ್ರೇಮಾಮೃತವು
ನಾನಿರುವುದೆಲ್ಲ ನಿನ್ನ ಭಜನಮಂದಿರವು 2
ನಾ ಕೇಳುವುದೆಲ್ಲ ನಿನ್ನ ಧರ್ಮಕಥಾಶ್ರವಣವು
ನಾ ಪೇಳ್ವುದೆಲ್ಲ ನಿನ್ನ ಚರಣಸುಚರಿತ
ನಾನು ಮಾಡುವುದೆಲ್ಲ ನಿನ್ನ ಪೂಜೆಯು
ನಾನನುಭವಿಪುದು ಎಲ್ಲ ಶ್ರೀರಾಮನಾಟವು 3