ಕೇಳು ನಾ ಪೇಳ್ವದೊಂದಾ ನಿತ್ಯಾನಂದಾ ಪ.
ಕೇಳು ನಾ ಪೇಳ್ವದೊಂದಾ ಕಂಸಾದ್ಯಸುರವೃಂದ
ಸೀಳಿ ಶೀಘ್ರಾದಿ ಪರಿಹರಿಸಿದಿ ಪಿತೃ ಬಂಧ ಅ.ಪ.
ನಿಗಮ ತತಿಗಳು ನಿಶ್ಯೇಷ ತಿಳಿಯದ
ಸುಗುಣವಾರಿಧಿ ಸುಖಬೋಧ ದೇಹ
ಸ್ವಗತ ಖೇದೊಝ್ಝಿತ ಸರ್ವ ನಿಯಾಮಕ
ಖಗಪತಿವಾಹನ ಕಾಮಿತ ಭಾವನ
ಪಾಲನ ಪರಾತ್ಪರ
ಸ್ವಗತಿ ನಿಯತಿ ಜ್ಞಾನ ದಾಯಕ
ತ್ರಿಗುಣ ವರ್ಜಿತ ತ್ರಿಭುವನೇಶ್ವರ
ಮಗುವು ನುಡಿವುದ ಮಾತೆಯಂದದಿ 1
ಮೊದಲಿನ ಭವಗಳ ಹದನ ಒಂದರಿಯೆನು
ಪಾದ ಪದುಮಗಳ
ಸದರದಿ ಸೇವಿಸಲಧಿಕ ಸಾಧನ ಮಾನು
ಷ್ಯದಿ ಬಂದು ವೈಷ್ಣವ ಬುಧರಾ ಸೇವೆಯ ಬಿಟ್ಟು
ವಿಧವಿಧ ಮೋಹಾಂಧಕಾರಗ-
ಳುದಿಸಲದರೊಳು ಸಿಲುಕಿ ನಿರುಪದಿ
ಬಧಿರ ಮೂಕ ಜಡಾಂಧನಾದೆನು
ಸದಯ ಇನ್ನಾದರೂ ಕಟಾಕ್ಷದಿ 2
ತಾಪತ್ರಯೋನ್ಮೂಲನೇಶಾ ಕೌಸ್ತುಭಭೂಷ
ಸುಜನ ಗಣೈಕ ಪೋಷಾ
ಈಪರಿಯೊಳಗೆನ್ನ ಜರಿವದುಚಿತವೇನೊ
ಕಾಪುರುಷರ ಸಂಗ ಕಡಿದು ಕರುಣವಿಟ್ಟು
ಶ್ರೀ ಪಯೋಜ ಭವೇಂದ್ರ ವಂದ್ಯ ಪ್ರ-
ದೀಪ ಸತ್ಸಿದ್ಧಾಂತ ತಿಳಿಸಿ ಪ-
ದೇ ಪದೇ ಕಾಪಾಡು ವೆಂಕಟ
ಭೂಪ ನೀ ಗತಿಯೆಂದು ನಂಬಿದೆ ಕೇಳು 3

ಸಾವಾತ ನಾನಲ್ಲಾ ಸಾವು ಮೊದಲೆನಗಿಲ್ಲಾ
ಯೋಗಿ ತಾ ಬಲ್ಲಾ ಪ
ಧರೆಯೆನಿಸಿ ದೊರೆಯಾಜÉ್ಞಯೊಳಾಳುತಿಹೆ ನಾನು
ವರಮಂತ್ರಿಯಾಗಿ ವರ್ತಿಸುವವನೆ ನಾನು
ಕರಣಿಕರ ತೆರದಿ ಲೆಕ್ಕವ ನೋಡುತಿಹೆ ನಾನು
ಪರಿವಾರವಾಗಿ ಓಲೈಸುವವನೆ ನಾನು 1
ವಾಹನ ಹೊರುವಾತ ನಾನು ಹೊತ್ತಂತಿರುವೆ ನಾನು
ಹರಿನಾಮ ಹರನಾನು ನರನಾನು ಸರ್ವವೀ
ಪರಿಯೊಳಗೆ ಮೆರೆದು ವಿಸ್ತರಿಪೆ ನಾನು 2
ಅಣುರೇಣು ತೃಣಕಾಷ್ಠ ಭರಿತನಾಗಿಹೆ ನಾನು
ಗಣನೆಯಿಲ್ಲದ ಗುಣವ ತೋರ್ಪೆ ನಾನು
ಉಣಲಿಕ್ಕುವವ ನಾನು ಉಂಡು ತೃಪ್ತಿಪೆ ನಾನು
ರಣನಾನು ರಣವ ಗೆಲುವಾತ ನಾನು 3
ಭೂಮಿಯಾಗಿಹೆ ನಾನು ಬೆಳೆವ ಬೆಳೆಯೇ ನಾನು
ಸೋಮ ಸೂರ್ಯಾಗ್ನಿ ವಾಯುಗಳೆ ನಾನು
ನಾಮರೂಪಾತೀತ ವಸ್ತುವಾಗಿಹೆ ನಾನು
ಕಾಮಿನಿಯರಾಗಿ ಕಾಮಿಸುವವನೆ ನಾನು 4
ಒಲಿವಾತನೇ ನಾನು ಒಲಿದರಗಲೆ ನಾನು
ಕೊಲಿಸಿಕೊಂಬುವೆ ನಾನು ಕೊಲುವಾತ ನಾನು
ಸುಲಭದಿಂದಲಿ ಜ್ಞಾನ ಫಲವಿಕ್ಕುವವ ನಾನು
ಚೆಲುವ ವಿಮಲಾನಂದ ಗುರುರಾಯ ನಾನು 5