ಇದಕು ಸಮ್ಮತನಾಗೆಲೋ ನೀ
ನದಕುನು ಸಮ್ಮತನಾಗೆಲೊ ಪ
ಇದು ಅದು ಎಂಬುದರ್ವಿಧವ ತಿಳಿದು ನೀ
ನೆದಕುನು ಸಮ್ಮತನಾಗೆಲೊ ಅ.ಪ
ಕಡುಸಿರಿಯೆಂಬುದು ಮರವೆಕುಣಿ
ಬಡತನವೆಂಬುದು ಅರಿವಿನಮನೆ
ಒಡೆತನವೆಂಬುದು ಪಾಪದ ಗೋಣು
ದುಡಿತವೆಂಬುವುದು ಜ್ಞಾನದ ಖನಿ
ದೃಢದಿಂದರಿದು ಹುಡುಕಾಡಿದರೋ
ಳ್ಹಿಡಕೋ ನಿನಗೆ ಹಿತವಾವುದು ನೋಡಿ1
ಕೆಟ್ಟ ಸಂಸಾರ ಹೇಯಮೂತ್ರ ಕುಣಿ
ನಿಷ್ಠೆ ಭಕ್ತಿ ಆನಂದಾಮೃತ ಖಣಿ
ದುಷ್ಟಜನರ ಸಂಗ ನರಕಕುಣಿ
ಶಿಷ್ಟ ಸಜ್ಜನಸಂಗ ಮುಕ್ತಿಮನೆ
ನಿಷ್ಠೆಯಿಂದರಿತು ಇಷ್ಟರೊಳಗೆ ನೀ
ಇಷ್ಟಕೆ ಬಂದದ್ದು ಹಿಡಕೋ ನೋಡಿ 2
ನರರ ಸೇವೆ ಮಹ ದುರಿತಬೇರು
ಶರಣರ ಸೇವೆ ಸ್ಥಿರಸುಖದ ತವರು
ಬರಿದೆ ಕೆಡದೆ ಹರಿಚರಣ ಕೋರು
ಮರುಳು ಗುಣಗಳೆಲ್ಲ ತರಿದು ತೂರು
ಧೀರ ಶ್ರೀರಾಮನ ಚಾರುಚರಣ ಸೇರಿ
ಪರಮಪದವಿಯೊಳು ಲೋಲ್ಯಾಡು 3

ಕಂಸಾರಿನಿಜಪಾದ ಮರೆಯದಿರೆಲೆ ಮನವೆ
ಸಂಸಾರಸುಖ ನೆಚ್ಚಿ ಭ್ರಮೆಯೊಳಗೆ ಬಿದ್ದು ಪ
ಜನನಿಜನಕರುವನಿತೆತನುಜನುಜರಿವರೆಲ್ಲ
ನಿನಗ್ಹಿತದಶತ್ರೆಂದು ನೆನೆಸಿಕೊಳ್ಳದಲೆ
ಅನುದಿನವು ದುಡಿದುಡಿದು ತನುಮನಧನವನಿತು
ಬಿನುಗರಿಗೆ ಸಲಿಸಿ ನರಕಕುಣಿಯೊಳಗೆ ಬಿದ್ದು 1
ಹೊಲಸುಕಿಲ್ಬಿಷಮಾಂಸ ಮೇಲೆ ಚರ್ಮದ ಹೊದಿಕೆ
ಬಲವಾಗಿ ಬಿಗಿದ ನರ ಎಲುವಿನ್ಹಂದರವು
ತೊಳೆಯದಿರ್ದರೆ ನಿಮಿಷ ಹೊಲಸುನಾರುವ ಮಹ
ಮಲಭಾಂಡಕ್ಕೊಲಿದು ಬಲು ಸಿಲುಕಿ ಬಂಧದೊಳು 2
ಜಡದಮೇಲಣ ಲಿಪಿಯು ಒಡನೆ ಮಾಯಪ್ಪಂತೆ
ಪೊಡವಿಯ ಸುಖ ನಿಮಿಷದಡಗಿ ಪೋಗುವುದು
ಅಡಿಗಡಿಗೆ ಎಡೆಬಿಡದೆ ಒಡೆಯ ಶ್ರೀರಾಮನಲಿ
ದೃಢವಾಗಿ ನೆರೆನಂಬಿ ಪಡಕೋ ನಿಜಸುಖವ 3