ದರುಶನವನು ಕೊಡೆಲೊ ದೇವ ಪ
ಸರಸಿಜ ಮಿತ್ರನು ಮೂಡೆ ಪ್ರಾರ್ಥಿಸುವೆನು ಅ.ಪ
ತುಂಗಾ ಕೃಷ್ಣ ಕಾವೇರಿ
ಗಂಗೆ ಯಮುನೆ ಗೋದಾವರಿ ನರ್ಮದಾ
ಮಂಗಳ ನದಿಗಳು ಕಾದುಕೊಂಡಿರುವುವು
ರಂಗ ನಿನ್ನ ಚರಣಂಗಳ ಸೇವೆಗೆ 1
ಜಗವನುದ್ಧರಿಸಿದ ಸುಂದರ ನಿನ್ನಯ
ಮೊಗವನು ನೋಡುತ ಸಂಭ್ರಮದಿ
ಬಗೆ ಬಗೆ ಹೈಮವಸ್ತ್ರಗಳನು ಧರಿಸುತ
ನಗವೃಂದವು ಕಾದಿರುವುದು ದೇವ 2
ತರುಲತೆಗಳು ಕಾದಿರುವುದು ಪೂಮಳೆ
ಗರೆಯಲು ನಿನ್ನಯ ಶಿರದಲ್ಲಿ
ಪರಮಹಂಸರುಗಳು ಕರದಲಿ ಜಪಮಣಿ
ಧರಿಸಿ ಜಪಿಸುವರೊ ಕರುಣಾ ಪ್ರಸನ್ನನೆ 3