ಭೃಗುವಂಶಸಂಭೂತ ಜಗತ್ರಯ ವಿಖ್ಯಾತ
ಅಘದೂರ ಪರಶುಧರ ಧೈರ್ಯಸಾರ
ಪರಿಹಾರ ಭಕ್ತಜನಮಂದಾರ
ಭೂಭುಜತರುಕುಠಾರ ಅನುಸಾರ
ರುಚಿಕನಂದನ ಬಾಲ ಶೌಚ ಸತ್ಯಸುಶೀಲ
ದ್ವಿಜಸಂಘ ಪರಿಪಾಲ ದಾನಶೀಲ
ಸಹಸ್ರಭುಜ ವಿದಾರ ಅಹಿತಜನ ಮದಹರ
ವಿಹಿತಪಥ ಸಂಚಾರ ಪಾಹಿಸುಕರ
ಕೃಪಾರ್ಣವ ಭಾರ್ಗವ ಸುಪ್ರಭಾವ
ಕೋಪಜಿತ ಭೂಪಾಲ ದೇವದೇವ
ತಾಪಹರ ಶೇಷಾದ್ರಿ ನಿಲಯ ಸದಯ
ಶ್ರೀಪರಂಧಾಮ ಸತ್ಕೀರ್ತಿ ಕಾಮ

ಹೆತ್ತವರಿಗೆರವಾಗಿ ಹೆರವರಿಗೆ ಮಗನಾಗಿ
ಚಿತ್ತದೊಳು ನಲಿವವನೆ ಮತ್ತನಿವನೆ
ತುಂಟತನದೊಳಗೆ ಸರಿಯುಂಟೆ ಈತಗೆ ಜಗದಿ
ನಂಟರನು ಗೋಳಿಡುವ ತುಂಟನಿವನೆ
ವಂಚಕರಿಗೆಲ್ಲರಿಗೆ ಸಂಚಕಾರವ ಕೊಡುವ
ಚಂಚಲಾಕ್ಷಿಯರನ್ನೆ ವಂಚಿಸಿರುವ
ಮಾನವರೊಳಿಂತಪ್ಪ ಮಾನಿಯಂ ನಾನರಿಯೆ
ಮೀನಾಂಕ ಸಮರದೊಳ್ ಜಾಣನಿವನೆ
ಜಾರರೋಳ್ ಕಡುಶೂರ ಮಾಯಕಾರ
ಚೋರತನದೊಳು ವೀರ ಭಯವಿದೂರ
ದಾರಿಕಾಯಲು ಧೀರ ಧೈರ್ಯಸಾರ
ಮಾರಪಿತ ಶೇಷಗಿರಿವರನೆ ನೀರ