ಕಂಡೆವು ಗುರುದಿವ್ಯ ಶ್ರೀ ಸುಚರಣ
ಮಂಡಲದೊಳಾಯಿತು ಸುಭೂಷಣ ಧ್ರುವ
ಇದೆ ನಿಜ ಪುಣ್ಯ ಪೂರ್ವಾರ್ಜಿತ
ಇದರಿಟ್ಟು ಬಂತೆನಗಾಯಿತು
ಒದಗಿ ಕೈಗೂಡಿತು ತ್ವರಿತ
ಹೃದಯಲೆನ್ನಾಯಿತು ಉದಿತ 1
ಕಣ್ಣಾರೆ ಕಂಡೆವು ನಿಜ ಧನ
ಜನುಮವೆನ್ನಾಯಿತು ಪಾವನ
ಎನ್ನೊಳು ದೋರಿತಾನಂದ ಘನ
ಧನ್ಯ ಧನ್ಯವಾಯಿತು ಜೀವನ 2
ಲೇಸು ಲೇಸಾಯಿತಯ್ಯ ನೋಡಿ
ಭಾವಿಸಿದ ಸದ್ಗುರು ದಯಮಾಡಿ
ವಾಸನೆ ಪೂರಿಸಿತು ಇಲ್ಲೆ ನೋಡಿ
ದಾಸಮಹಿಪತಿ ನಿಜಗೂಡಿ 3

ಧನ್ಯ ಧನ್ಯವಾಯಿತು ಎನ್ನ ಜನುಮ
ತನ್ನಿಂದ ತಾನೊಲಿದ ಘನ ಮಹಿಮ
ಎನ್ನೊಳಗೆ ದೋರಿತಾನಂದೊ ಬ್ರಹ್ಮ
ಕಣ್ಣಾರೆ ಕಂಡೆನು ಸದ್ಗುರು ಧರ್ಮ 1
ಬ್ರಹ್ಮಸುಖ ಹೊಳೆಯಿತು ಸಾಧುಸಂಗ
ಚುಮು ಚುಮು ಕೊಡುತಿದೆಕೊ ಸರ್ವಾಂಗ
ಧಿಮಿ ಧಿಮಿಗುಡುತ ತಾಲ ಮೃದಂಗ
ಸಮಾರಂಭವಾಯಿತು ಬಾಹ್ಯಂತರಂಗ 2
ಎದುರಿಟ್ಟು ಬಂತು ಪುಣ್ಯ ಪೂರ್ವಾರ್ಜಿತ
ಒದಗಿ ಕೈಗೂಡಿತೆನಗೆ ತ್ವರಿತ
ಸಾಧಿಸಿತು ಮಹಿಪತಿಯ ಮನೋರಥ
ಸದ್ಗುರು ಕೃಪೆಯಾಯಿತು ತಾ ಸದೋದಿತ 3

ಹರಿಸ್ಮರಣೆ ಪೂರಣ ಕರತನ್ನಿ ಧ್ರುವ
ಕರತನ್ನಿರೊ ವರಗುರು ಕೃಪೆಯಿಂದ
ಗುರುವರ ಮೂರುತಿ ಕರುಣಾನಂದ 1
ಕರುಣಿಸಿ ನೋಡಲು ಬಾಹುದು ಪುಣ್ಯ
ಶರಣ ಜನರಿಗಿದು ತಾರ್ಕಣ್ಯ 2
ತಾರ್ಕಣ್ಯಂಬುದು ತರ್ಕರಹಿತ
ಸರ್ಕನೆ ತಿಳಿವದು ತನ್ನೊಳು ಗುರುತ 3
ಗುರ್ತವಾಗಲು ನಿಜ ಹಿತಾರ್ಥ
ಅರ್ತವಗಿದು ಸ್ವಸುಖ ಪರಮಾರ್ಥ 4
ಪರಮಾರ್ಥವು ಪರಗತಿ ಸಾಧನ
ಪರಲೋಕಕೆ ಐದುವ ಸೊಪಾನ 5
ಸೋಪಾನವೆ ಸುಲ್ಲಭ ಸುಪಥ
ಉಪಾಯದಲಿ ತಿಳಿಯಲು ಸ್ವಹಿತ 6
ಸ್ವಹಿತ ಮಾರಿಕೊಂಬುದೇ ಸುಖ
ಸಾಹ್ಯ ಮಾಡುವ ಶ್ರೀ ಗುರುಕುಲತಿಲಕಾ 7
ಶ್ರೀಗುರು ಸೇವೆಯ ಮಾಡಿರೊ ಬ್ಯಾಗ
ಜಗದೊಳಗಿದು ಮಹಾ ಪುಣ್ಯದ ಯೋಗ 8
ಯೋಗವೆ ಮಹಾ ನಿಜ ಭಕ್ತರ ಪ್ರಾಣ
ಸುಗಮ ಸುಪಥ ಸದ್ಗತಿ ಸಾಧನ 9
ಸಾಧನ ಪಡೆವದು ಗುರುದಯ ಕರುಣ
ಸದಮಲ ಸುಖ ಸುಜ್ಞಾನದ ಸ್ಪುರಣ10
ಸ್ಪುರಣ ಸುಫಲಿತ ಸುಜನರ ಹೃದಯ
ಸುರ ಮುನಿ ಜನರಾನಂದದ ಉದಯ 11
ಉದಯವಾಯಿತು ಮಹಿಪತಿ ಮನದೊಳಗೆ
ಸದೋದಿತವಾಯಿತು ಗುರುಕೃಪೆಲೆನಗೆ 12
ಎನ್ನೊಳು ದೋರಿತಾನಂದದಲಹರಿ
ತನ್ನಿಂದಲಿ ತಾನೊಲಿದ ಶ್ರೀ ಹರಿ 13