ಭ್ರಮೆ ಬೇಡಲೆ ಮನ ತಿಳಿ ಜವದಿ ಹರಿ
ವಿಮಲಚರಣಕಮಲ್ಹಿಡಿ ದೃಢದಿ ಪ
ಸುಮನಸರಗೂಡಿ ನೀ ಸುಮಶರ ಪಿತನಂ
ಸಮಯ ತಿಳಿದು ಭಜಿಸನುದಿನದಿ ಅ.ಪ
ಸಾರವಿಲ್ಲದ ಸಂಸಾರ ಇದು
ಮೇರೆನಿಲ್ಲದ ಸಾಗರ
ಆರಿಗೆ ನಿಲುಕದೆ ಮೂರುಲೋಕವದ್ದಿ
ಮೀರಿಬಡಿಸುವುದು ಬಲುಘೋರ 1
ಹೆಂಡರು ಮಕ್ಕಳೆಂದು ನಂಬಿದಿ ನಿನ್ನ
ಹಿಂಡಿನುಂಗುವುದು ಅರಿಯದ್ಹೋದಿ
ಕಂಡಕಂಡವರಿಗೆ ಮಂಡೆಬಾಗಿಸಿ ನಿನ್ನ
ದಂಡನೆಗೆಳಪುದು ಅಂತ್ಯದಿ 2
ಕಾಕುಜನರ ಸಂಗ್ಹಿಡಿದಿದ್ದಿ ನೀ
ಲೋಕನೆಚ್ಚಿ ನೂಕುನುಗ್ಗಾದಿ
ಲೋಕಗೆಲಿದು ಭವನೂಕಿ ನಲಿಯುವರ
ಸಾಕಾರಗಳಿಸದೆ ಕೆಟ್ಟ್ಹೋದಿ 3
ಧರೆಯ ಭೋಗವನು ಸ್ಥಿರ ತಿಳಿದಿ ನೀ
ಹರಿದು ಹೋಗುವದಕೊಲಿತಿದ್ದಿ
ಮರೆಮೋಸದಿ ಬಿದ್ದರು ಮೈಯಮರೆದು
ಸ್ಥಿರಸುಖ ಪಡೆಯದೆ ದಿನಗಳೆದಿ 4
ಭೂಮಿಸುಖಾರಿಗೆ ನಿಜವಲ್ಲ ಇದು
ಕಾಮಿಸಬೇಡೆಲೊ ಶೂಲ
ಕಾಮಿತಗಳನಿತ್ತು ಕ್ಷೇಮದಿ ಸಲಹುವ
ಸ್ವಾಮಿ ಶ್ರೀರಾಮನ ತಿಳಿಮಿಗಿಲ 5