ಆತ್ಮ ನಿವೇದನೆ
ಅನಾಥ ಬಂಧೋ ಆದಿ ಪುರುಷ ಪ.
ಅನಾಥ ಬಂಧೋ ಗುಣ ಗಣ ಸಿಂಧೋ
ಮನಸಿಜ ಜನಕನೆ ಮರೆಯದಿರೆಂದೂ ಅ.ಪ.
ಅನುಚಿತ ಕರ್ಮದ ಬಲೆಯಲಿ ಸಿಕ್ಕಿ
ದಿನಗಳ ಕಳೆದನು ಮನೆಯಲ್ಲಿ
ತನುವಿನ ಸ್ಥಿತಿಯನು ಪೇಳಲೇನು ಶ್ರೀ-
ವನಜ ಭವಾರ್ಚಿತ ಒದಗುವಿ ಸಮಯದಿ 1
ವಿಧಿ ನಿಮಯಗಳನುಸರಿಸದೆ ಕ-
ಣ್ಣಿದಿರಲಿ ಕಾಂಬುದ ಗ್ರಹಿಸದೆ
ಮಧುಮಥನನೆ ತ್ವತ್ಪರ ಪದ್ಮವ ನಂ-
ಬಿದೆ ಕರುಣೋದಧಿ ಕಾಯೊ ಬೇಗದಲಿ 2
ಸರ್ವಭಾರವು ನಿನ್ನ ಮೇಲಿಹುದು ಮ
ತ್ತೋರ್ವಗುಂಟೆ ನಿನ್ನಯ ಬಿರುದು
ಮರ್ವನೀಯದೆ ಮನದಲ್ಲಿರು ವೆಂಕಟ
ಪರ್ವತೇಂದ್ರ ಪೂರ್ಣಾನಂದಪ್ರದ 3

ಎಂದಿಗೆನಗೆ ಬುದ್ಧಿ ಬಂದಿತೋ ಹರಿಯೆ
ಇಂದೀವರಾಕ್ಷ ನೀನೆ ಗತಿ ದೊರೆಯೆ ಪ.
ಕಣ್ಣಿದಿರಲಿ ಕಂಡು ಕಾಲಗತಿಗಳನ್ನು
ತನ್ನ ಸಂಸ್ಥಿತಿ ಮುಂದೆಂತಾಹುದನು
ಚೆನ್ನಾಗಿ ಗ್ರಹಿಸದೆ ಚಪಲ ಚಿತ್ತದಿ ಗೃಹ
ಸನ್ಮಹದಲಿ ಮನವನಿಟ್ಟು ಬಳಲುವೆ 1
ಸಾಗದ ಕಾರ್ಯವ ಸುಲಭವೆಂದೆಣಿಸಿದ-
ರಾಗದು ಹಗಲಿರಳೊರಳಿದರು
ನಾಗಶಯನ ನೀನು ನಿರ್ಣಯಿಸಿದ ರೀತಿ
ಯಾಗುವದೆಂಬುದನರಿಯದೆ ಮರುಳಾದೆ 2
ಇಂತಾದ ಮ್ಯಾಲೆ ಶ್ರೀಕಾಂತ ನೀ ದೊರಕುವ-
ದೆಂತು ಸಂಘಟ್ಟಿಪದೋ ನಾನರಿಯೆ
ಕಂತುಜನಕ ವೆಂಕಟೇಶನೆ ಮಾನಸ
ಭ್ರಾಂತಿಯ ಬಿಡಿಸು ನಿಶ್ಚಿಂತೆಯಿಂದಿರಿಸ 3