ನಂದನ ಕಂದ ಬಂದ ಗೋವಿಂದ ಇಂದಿರಾನಂದ ರಾಧೆ ಮುಕುಂದ ಪ ವೃಂದಿತ ಬೃಂದಾರಕ ಖಗವೃಂದ ಸುಂದರ ಮುರಳೀ ನಾದಾನಂದ ಅ.ಪ ಘಣಿಮಣಿ ಭೂಷಣ ಮುನಿತೋಷಣ ಗಣಿಕಾಗಣ ಮನಮೋಹನ ತರುಣ ಝಣ ಝಂಝಣರವ ಕಿಣಿಕಿಣಿಚರಣ ಕುಣಿ ಕುಣಿವನು ಮಾಂಗಿರಿರಂಗ ಕರುಣ 1

ಎತ್ತಣದನಿಯಿದು ಎತ್ತಣ ಮಧುರವ
ಚಿತ್ತಾಕರ್ಷಕ ಬಾನುಲಿಯೇ ಪ
ಮತ್ತ ಭೃಂಗಾಳಿಯ ಝೇಂಕೃತಿ ಶ್ರುತಿಯು
ಸುತ್ತ ಮಯೂರದ ನಾಟ್ಯದ ನಲವೋ ಅ.ಪ
ಏಣಲೋಚನೆಯರ ಕಾಂಚನ ಕಿರುಗೆಜ್ಜೆ
ವೀಣಾನಾದವ ಅಣಕಿಪುದು
ತಾಣವದೆಲ್ಲಿಯೋ ಕಾಣಿರೆ ಸಖಿಯರೇ
ವೇಣು ಗೋಪಾಲನ ನಾಟ್ಯವಿದಲ್ತೇ 1
ಅಲ್ಲಿ ನೋಡೇ ತಂಗಿ ಬಾನೆಡೆಯಿಂದಲಿ
ಮಲ್ಲಿಗೆ ಪೂಮಳೆ ಸುರಿಯುತಿದೆ
ನಲ್ಲೆಯರಿಂಚರ ಸರಿಗಮಪದನಿಯು
ಎಲ್ಲ ರಾಗಗಳಲಿ ನಲಿಯುತಲಿಹುದು 2
ಅಂಗನೆಯರೆ ನಮ್ಮ ಗೆಜ್ಜೆಯ ಝಣರವ
ಮಂಗಳಗಾನಕೆ ಇಂಬಿರಲಿ
ಹೊಂಗೊಳಲೂದುವ ಚಿನ್ಮಯ ಮಾಂಗಿರಿ
ರಂಗನ ದರ್ಶನ ಮಾಡುವ ಬನ್ನಿ3

ಕೃಷ್ಣ ಸ್ತುತಿ
ಮಾಂಗಿರಿಯೊಡೆಯ ಗೋಪಾಲನೇ ಮಧುರ ಪ
ಗೋಪಾಲನ ಮಾಂಗಿರಿಯೇ ಮಧುರ ಅ.ಪ
ಪರಿ ಗೋಪಾಲನ ಗಜಗಮನವು ಮಧುರ 1
ಗೋಪಾಲನ ಮುರಳೀರವ ಮಧುರ
ಗೋಪಾಲನ ರಸಗಾನವೆ ಮಧುರ 2
ಗೋಪಾಲನ ಸಸುನಗೆಯತಿ ಮಧುರ
ಗೋಪಾಲನ ಕಲಾನರ್ತನ ಮಧುರ 3
ಗೋಪಾಲನ ಝಣ ಝಣರವ ಮಧುರ
ಗೋಪಾಲನ ಕೋಲಾಟವು ಮಧುರ 4
ಗೋಪಾಲನ ನಡುಗೆಜ್ಜೆಯು ಮಧುರ
ಗೋಪಾಲನ ಕರದಭಯವು ಮಧುರ 5

ಗೋಪಾಲ ಬಾಲಾ ತ್ರಿಭುವನ ಪಾಲಾ ಕರುಣಾಲವಾಲ
ಗೋಪಾಲ ಬಾಲಾ ಗೋಪೀ ಬಾಲಾ ಭಕುತಾನುಕೂಲ ಪ
ಪಾಪಕುಲಾನಲ ತಾಪಸ ಸಂಕುಲ
ಶ್ರೀಪತೆ ಮಾಂಗಿರಿನಿಲಯ ಶುಭಾಕುಲ
ತಾಪತ್ರಯ ಕುಲಜಾಲ ನಿರ್ಮೂಲ
ಗೋಪಗೋಪಿಕಾನಂದದುಕೂಲಾಅ.ಪ
ಮುರಳೀಧರ ಘನಸುಂದರ ಭಾವ ದೇವಾದಿದೇವ
ಸರಸೀರುಹದಳನಯನ ಸ್ವಭಾವಾ ಜೀವಾದಿಜೀವ
ವರದಾಯಕ ಶರಣರ ಸಂಜೀವಾ ಮೃದುಮಧುರಸ್ವಭಾವ
ಸ್ವರನಾದದಿ ಘಲು ಘಲ್ಲೆನುತಿರುವಾ
ವರನೂಪುರದುಂಗುರ ಝಣ ಝಣರವ
ಹರುಷದೊಳೆಲ್ಲೆಡೆಯೊಳು ನಲಿನಲಿದಾಡುವ 1
ಮುದ್ದಾಡಿ ನಲಿಯಳೆ ನಿನ್ನ ಯಶೋದಾ ಅಘರೂಪವಾದ
ಮುದ್ದೆ ಬೆಣ್ಣೆಯ ಮೆಲುವಾತುರದಿಂದ ಕರಯುಗಗಳಿಂದ
ಕದ್ದು ನೀ ನೋಡುವುದೇ ಅತಿಚೆಂದ ಭಕ್ತರಾನಂದಾ
ಮದ್ದುಣಿಸಿದಳ ಒದ್ದು ಸಂಹರಿಸಿದ
ಮೆದ್ದು ಉದ್ಧರಿಸೊ ಗೋವಿಂದ ನಂದನಕಂದ 2
ಅಕ್ಕೋ ಬೃಂದಾವನದಾನಂದ ಹೊಂಗೊಳಲಿಂದಾ
ಇಕ್ಕೋ ಚೆಂದದ ಗಾನಾನಂದ ಕಿರುನಗೆಯಿಂದ
ಕಕ್ಕುಲತೆಯ ಮದದಿಕ್ಕೆಗೆ ಸಿಲುಕದ
ಠಕ್ಕುಗಾರ ಸೊಬಗಿಂದ ರಾಧೆಗೆ ಮುದ
ವಿಕ್ಕಿ ಮಡುವ ಧುಮ್ಮಿಕ್ಕಿ ನರ್ತನಗೈದ 3
ವೈರಿ ಕಂಸಾರಿ ಶೌರಿ
ಬಾ ಬಾರೋ ಪಾಂಡವ ಪಕ್ಷ ವಿಹಾರೀ ಶಿಶುಪಾಲ ಸಂಹಾರೀ
ಭವ ಬಂಧನ ಪರಿಹಾರಿ ಶರಣರಿಗುಪಕಾರೀ
ಇಭಕುಲಕೇಸರಿ ಘನ ಗಿರಿಧಾರೀ
ಅಭಯಪ್ರದ ಹರಿ ಗೂಢಸಂಚಾರಿ
ನಭಚರಹರಿ ಮಾಂಗಿರಿ ಸುವಿಹಾರೀ 4

ನಾಟ್ಯಕಲಾವಿದ ಶಿವನೋ ಕೇಶವನೋ
ನಾಟ್ಯಕೆ ನಲಿವನಾ ಭವನೋ ಮಾಧವನೋ ಪ
ನಾಟ್ಯಾಪ್ಸರಗಣವೇಷ್ಟಿತನಿವನು
ನ್ಯಾಟ್ಯದಿಸಕಲರಾಭೀಷ್ಟದನವನು ಅ.ಪ
ಝಣ ಝಣ ಝಣರವ ರಣಿಪನಿವನು
ಕಿಣಿ ಕಿಣಿ ಕಿಣಿರವ ಚೆಲ್ಲುವನವನು
ಗಣ ಗಣ ನಾದದಿ ವರ್ತಿಪನಿವನು
ಮಣಿಗಣನಾದದಿ ನರ್ತಿಪನವನು 1
ಮುರಳಿಯಗಾನವ ಪಾಡುವನಿವನು
ನಿರುಪಮ ದಿವಿಜಾ ನರ್ತಕನವನು
ಭರತನಾಟ್ಯ ಕಲಾ ಕೋವಿದನಿವನು
[ವರ ನಾಟ್ಯ ನಟನಾ ನಿಪುಣನವನು] 2
ಭೇರಿನಗಾರೀ ತುತ್ತೂರಿ ಡಮರುಗ
ಕರಿಮುಖ ಷಣ್ಮುಖಯುತ ಭಸಿತಾಂಗ
ನಾರದ ತುಂಬುರ ವೀಣೆ ಮೃದಂಗ
ಸಾರಗಾನಯುತ ಮಾಂಗಿರಿರಂಗ 3