ಅವತಾರ
ಸಿರಿವರ ಘನ ಕರುಣಾಕರ ಪೊರೆಯೈ ಪ.
ನಿಗಮಚೋರನನ್ನು ಕೊಂದು ನಗವಪೊತ್ತನೆ
ವಿಗಡದೈತ್ಯನನ್ನ ಸೀಳಿ ಜಗವನಾಂತನೇ 1
ಘುಡುಘುಡಿಸಿ ಕಂಬವನು ಒಡೆದುಬಂದನೆ
ಪಿಡಿದು ಖಳನ ಕರುಳಬಗೆದು ಕೊರಳೊಳಾಂತನೆ2
ಇಂದ್ರಗನುಜನಾಗಿ ದಾನವೇಂದ್ರ ಗೊಲಿದು ನೀಂ
ನಿಂದು ಬಾಗಿಲಕಾವ ಗೊಲ್ಲನಂದಮೇನಿದೈ 3
ಹಡೆದತಾಯ ಶಿರವಪಿಡಿದು ಕಡೆದ ಭಾರ್ಗವ
ಮಡದಿಚೋರನನ್ನು ಕೊಂದ ಒಡೆಯ ರಾಘವ 4
ಮಾವ ಕಂಸನ ಕೊಂದ ವಸುದೇವನಂದನ
ಮಾಧವ 5
ಮತ್ತೆ ತ್ರಿಪುರ ಸತಿಯರ ಚಿತ್ತಕಲಕಿದ
ಉತ್ತಮಾಶ್ವವನ್ನೆ ಹತ್ತಿ ಕಲ್ಕಿಯೆನಿಸಿದ 6
ಉರಗಶಯನ ಗರುಡಗಮನ ಪರಮಪಾವನ
ವರದ ಶೇಷಶಿಖರಧಾಮ ಶ್ರೀನಿಕೇತನ 7

ವೀರಮಂಡಿ ಹೂಡಿರುವುದು | ಕಾರಣೇನು
ವೀರ ಹನುಮ ಪೇಳು ನೀನಿದ ಪ.
ರಾಮ ಹೆಗಲ ಏರಲೆನ್ನುತಾ | ಕುಳಿತಿಯೇನೊ
ನೇಮದಿಂದ ದಾಸನಾಗುತ
ಕಾಮಿನಿಯ ಚೋರನನ್ನು
ಧೂಮಕೆಡಹಲೆಂದು ರಾಮ
ಆ ಮಹಾರಣರಂಗದಲ್ಲಿ
ಸ್ವಾಮಿಗೆ ಜಯವಿತ್ತು ಮೆರೆದೆ 1
ದ್ರೌಪದಿಯ ಮುಡಿಯನೆಳೆದನ | ಎದೆಯ ಮೇಲೆ
ಕೋಪದಿಂದ ಕುಳಿತು ಕರುಳಿನ
ಪಾಪಿ ಉರವ ಬಗೆದು ಘೋರ
ರೂಪ ತೋರಿ ಶತ್ರುಗಳಿಗೆ
ಶ್ರೀಪತಿಗೆ ಅರ್ಪಿಸಿದ್ದು
ಈ ಪರಿಯೆ ಪೇಳು ಹನುಮ 2
ಅಭಯಹಸ್ತ ತೋರುತಿರುವುದು | ಭಕ್ತರಿಗೆ
ಉಭಯ ತತ್ವಜ್ಞಾನ ಕೊಡುವುದು
ಇಭವರದ ಗೋಪಾಲ ಕೃ-
ಷ್ಣವಿಠಲನಂಘ್ರಿ ಕಮಲ
ದೃಢದ ಬುದ್ಧಿ ಕೊಡುವ ತೆರವೊ 3