ಬಿಡಲಾರೇ ಬಿಡಲಾರೇ ಪ
ಕಡಲೊಳು ಪವಡಿಪ ಮೃಡನುತನಾಮನ ಅ.ಪ
ಕಾಶಿಯೊಳಗೆ ವಿಶ್ವೇಶನು ಬೋಧಿಪ
ದಾಶರಥಿಯ ವರ ಸಾಸಿರ ನಾಮವ 1
ಗೌರವದಿಂದಲಿ ಗೌರಿಯು ಜಪಿಸುವ
ಗೌರನೆನಿಪದುರಿತಾರಿಯ ನಾಮವ 2
ಭಕ್ತರು ಸಕಲ ವಿರಕ್ತರು ನಿತ್ಯದಿ
ರಕ್ತಿಪಡುವ ಗುಣಯುಕ್ತನ ನಾಮನ 3
ಇಷ್ಟದಿ ನೆನೆವರ ಕಷ್ಟವಳಿದು ಮನ
ದಿಷ್ಟ ಕೊಡುವ ಪರಮೇಷ್ಟಿಯ ನಾಮವ 4
ಚರಣವ ನಂಬಿದ ಶರಣರ ಪೊರೆಯುವ
ವರದವಿಠಲ ದೊರೆ ವರದನ ನಾಮವ 5

ರಜತಗಿರೀಶ್ವರ ಮಹಾನುಭಾವ
ಗಜಚರ್ಮಾಂಬರ ನಮೋ ನಮೋ ಪ
ವಿಜಯರಾಮಾರ್ಚಿತ ಪದಕಮಲ
ಅಜಸುತ ಸೇವಿತ ನಮೋ ನಮೋ ಅ.ಪ
ವಾರಣಾಸಿ ಸುಕ್ಷೇತ್ರ ನಿವಾಸ
ಪರಮೋಲ್ಲಾಸ ನಮೋ ನಮೋ
ಭೂರಿ ವೈಭವಾನಂದ ವಿಲಾಸ
ರವಿಶತಭಾಸಾ ನಮೋ ನಮೋ 1
ನಾದಾಲಂಕೃತ ವರದಾತಾ ಶ್ರೀ
ಗೌರಿಯುತ ನಮೋ ನಮೋ
ಭಾಗೀರಥೀಪ್ರಿಯ ಲೋಕನುತ
ದೇವೇಂದ್ರಾತ ನಮೋ ನಮೋ2
ಮಂಗಳದಾಯಕ ಶಶಿಶಿಖರ
ಸಂಗವಿದೂರಾ ನಮೋ ನಮೋ
ಮಾಂಗಿರಿ ಶೃಂಗವಿರಾಜಿತಶಂಕರ
ಶರಣಶುಭಂಕರ ನಮೋ ನಮೋ 3