3. ಎಲ್ಲ ಆಳ್ವಾರರು
ಆಳ್ವಾರ್ ತಿರುವಡಿಗಳೆ ಶರಣೆನ್ನುತ
ಬಾಳ್ವರು ಭಜಿಪುದು ಬಕುತಿಯಲಿ ಪ
ಕೇಳ್ವರು ಕಥೆಗಳ ಮಮತೆಯಿಂದಲಿ
ಮಾಳ್ವರು ಮನೆ ವೈಕುಂಠದಲಿ ಅ.ಪ
ಮೊದಲಿನ ಮೂವರು ಮಾಧವನೆನುತ್ತ
ಪದುಮನಾಭನೊಡನಾಡಿದರು
ಅದುಭುತ ಮಹಿಮಾ ತಿರುಮೊಳಿಶಯ್ಯರ
ಮುದದಿಂ ಶಿವ ಕೊಂಡಾಡಿದನು 1
ಮಧುರಕವಿಗಳು ನಮ್ಮಾಳ್ವಾರರ
ಪದಗಳ ಪೂಜಿಸಿ ಹಾಡಿದರು
ತದುಪರಿ ತಿರುವಾಯ್ಮೊಳಿಯನು ಅವರಿಂ
ದಧಿಕರಿಸುತ ಹಿತವೆಸಗಿದರು 2
ಪೆರಿಯಾಳ್ವಾರರು ಹರಿಯನು ಪಾಡುತ
ವರವೇದಕೆ ತಾವ್ ಮೊದಲಿಗರು
ಪರಮಪಾವನೆ ಗೋದಾದೇವಿಯು
ದೊರೆ ಶ್ರೀರಂಗನ ಕೈವಿಡಿದಳ್ 3
ಪೆರಿಯ ತಿರುಮೊಳಿಯ ತಿರುಮಂಗೈಯ್ಯರು
ತಿರುಪ್ಪಾಣ ವಿಪ್ರನಾರಾಯಣ
ತಿರುವನಂತಪುರದ ಕುಲಶೇಖರರು
ಸಿರಿಯರಸನ ತೇರ ಮಾಡಿದರು 4
ಪರಮಾತ್ಮನ ಸನ್ನಿಧಿಯಿಂದಲ್ಲಿಗೆ
ತೆರಳುತ ಮಹಿಮೆಯ ತೋರಿದರು
ನಿರುತ ದೇವರೆಡೆ ಪೂಜೆಗೊಂಬರು
ವರಜಾಜೀಶನ ಸೇವಕರು 5

ಪಾಂಡವಪಕ್ಷ ಪಾರ್ಥಸಾರಥಿಗೆ
ಆಂಡಾಳ್ ಮಾಲೆಯ ಧರಿಸಿದಳು ಪ
ಸೃಷ್ಟಿಜಾತೆಯು ಶೃಂಗಾರವಾಗಿ ಬಂದು
ಕೃಷ್ಣಮೂರುತಿಯೆದುರಲ್ಲಿ ನಿಂದು
ಅಷ್ಟವಿಧದ ಪುಷ್ಟಮಾಲೆಗಳನ್ನು ತೆಗೆದು
ತಟ್ಟೆಯೊಳಗೆ ಇಟ್ಟು ಕಳುಹಿದಳು 1
ಆದಿಮೂರುತಿ ಮಂಟಪದಲ್ಲಿ ಕುಳಿತಿರೆ
ಶ್ರೀದೇವಿ ಭೂದೇವಿ ಸಹಿತವಾಗಿ
ವೇದಮೂರುತಿಯನು ನೋಡಿ ಸಂತೋಷದಿ
ಗೋದಾದೇವಿಯು ಮಾಲೆ ಧರಿಸಿದಳು 2
ಮರುಗ ಮಲ್ಲಿಗೆ ಜಾಜಿ ಸುರಗಿ ಶಾವಂತಿಗೆ
ಇರುವಂತಿಗೆ ಪಚ್ಚೆ ಮುಡಿದಾಳ
ಪರಿಪರಿ ಪುಪ್ಪದ ಸರಗಳ ಪಿಡಿದು
ಧರಣಿದೇವಿಗೆ ಸ್ವಾಮಿ ಧರಿಸಿದಳು 3
ತಾಳೆ ಚಂಪಕ ವಕುಳಮಾಲೆ ಮಂದಾರಪುಷ್ಪ
ಕಮಲ ಸುಗಂಧರಾಜ
ನೀಲವರ್ಣನ ಮುಖ ನೋಡಿ ಸಂತೋಷದಿ
ನೀಳಾದೇವಿಯು ಮಾಲೆ ಧರಿಸಿದಳು 4
ಕಮಲವ ಕರದಲ್ಲಿ ಪಿಡಿದಿಹ ಕಾಂತೆಗೆ
ಕಮಲವದನೆಯೆಂದೆನಿಸಿದವಳಿಗೆ
ಕಮಲಾಕ್ಷಿಗೆ ಶ್ರೀವೆಂಕಟಕೃಷ್ಣನು
ಕಮಲನಾಭನು ಮಾಲೆ ಧರಿಸಿದನು 5