ಬತ್ತಿಗೆ ಹತ್ತದ ಜ್ಯೋತಿಯು ನಡು
ನೆತ್ತಿಯೊಳಿಂ ಬಿಟ್ಟು ಜತನ ಮಾಡಣ್ಣಾ ಪ
ತೈಲ್ಯವು ಸರಿಯಾಗದು ನೋಡು ಅಶುದ್ಧ
ಮೈಲಿಗೆಯಿದ್ದರೆ ಕಳದೀತು
ಕೈಲಾಸಪತಿಯ ಧ್ಯಾನವ ಮಾಡು ಬಟ್ಟ
ಬೈಲಲ್ಲಿ ಬೆಳಗಾಗುತಿದೆ ಮುಂದೆ ನೋಡು 1
ಕತ್ತಲೆ ಬೆಳಕಲ್ಲಿ ಉಳಿಯದು ಮಾಯಾ
ಮೃತ್ಯುಪಾಶಗಳಲ್ಲಿ ಸುಳಿಯದು
ನಿತ್ಯ ನಿರ್ಮಲವೆಂಬ ಗೆಲವದು ಪರ
ವಸ್ತುವಿನೊಳಗೆ ಕೂಡಿರುವುದು ಅಣ್ಣಾ 2
ನಿಂದಿಹ ನಿಜಕೆ ತಾ ನಿಲುವದು ಪರ
ದ್ವಂದ್ವಾಕಾರಗಳೆಲ್ಲ ಗೆಲುವದು
ಕುಂದು ದುಷ್ಕರ್ಮವ ಕೊಲುವದು ವಿಮಲಾ
ನಂದನ ಚರಣಕೆ ಸಲುವದು ಅಣ್ಣಾ 3

ಭೃಂಗ ಭಕ್ತ
ಕಾಮಿತಾರ್ಥದ ಮಂಗಳಾಂಗ
ತಾಮಸಬಲ ನಿಗ್ರಹಣ ಪತಂಗ ಭ
ವಾಮಯಹರ ಭಾರತಿ ಮುಖ ಸಂಗ ಪ.
ಮಾನ ಸೇವರಾತಿ ಭೂಪ
ಭಾನುಸರಣ ಸುಪ್ರತಾಪ ದೈತ್ಯ
ಕ್ಷೋಣಿ ಸಂದರ್ಶಿತ ಕೋಪ
ಜಾನಕಿವರನ ನಿಜಾನುಗನೆನಿಪ ಮ-
ಹಾನುಭಾವ ಪವಮಾನ ದಯಾಪರ 1
ಇಂದು ಕುಲದಿ ತಾ ಜನಿಸಿ ನಿಜ
ಬಂಧುಗಳನು ಸತ್ಕರಿಸಿ
ಇಂದಿರೆಯರಸನ ಒಲಿಸಿ ಜರಾ-
ಸಂಧ ಮುಖರನು ಸಂಹರಿಸಿ
ಒಂದೇ ಕ್ಷಣದಿ ಸೌಗಂಧಿಕ ಕುಸುಮವ
ತಂದು ಮಡದಿಗಾನಂದ ತೋರಿದ 2
ಕಲಿಯುಗದೊಳು ತಾ ಬಂದು ಮಾಯಿ
ಬಲಿ ಭುಜರನು ಗೆಲವಂದು
ಜಲಜನಾಭವ ಕರೆತಂದು ರೌಪ್ಯ
ನಿಲಯದಿ ಸ್ಥಾಪಿಸಿ ನಿಂದು
ಚೆಲುವ ಶೇಷಗಿರಿ ಪತಿಗತಿಯೆಂದು
ನೆಲೆಯ ತೋರಿದ ಪುರುಕರುಣಾಸಿಂಧು 3