ಭಕುತರಿಗಾಶೀರ್ವಾದಗಳು ಕುಶಲಕೆ ಬರೆಯುತಲಿರಿ ಎನಗೆ ಪ
ಯುಕುತಿಗಳನು ಬರೆದಿಹೆನಿಲ್ಲ ಅ.ಪ
ಬೆರೆಯಬೇಡಿ ಈ ಜಗದ ರಗಳೆಯಲಿ
ಮರೆಯಬೇಡಿ ಎನ್ನನು ಕ್ಷಣವು
ಬೆರೆಯದೆ ಮರೆಯದೆ ಇರುವ ಧೀರರನು
ಪೊರೆಯುವುದೇ ಎನ್ನಯ ಗುರಿಯು 1
ನಾಳೆಗೆ ಅಣಿಮಾಡಲು ಕೈಲಾಗದೆ
ಗೋಳೇತಕೆ ನಾನೊದಗಿಸುವೆ
ಕಾಲು ಕೈಗಳೊದ್ದಾಡುವತನಕ
ಮೇಲೆತ್ತುವುದಳವೇ ಎನಗೆ 2
ಬಿಸಿಲು ಗಾಳಿ ಮಳೆಗಳು ಸಿದ್ಧೌಷಧ
ಹಸನ ಮುಖವೆ ನಿಮ್ಮಯ ಪಥ್ಯ
ರಸ ಕವಳವು ಬೇಕಾದರೆ ಕೊಳೆಯುವ
ರಸವನು ತಿನ್ನಲು ಬಯಸದಿರಿ 3
ಕತ್ತಲಿನಲಿ ಓಡÀುತಲಿರುವಿರಿ
ಸತ್ತಿರುವುದೆ ನಿಮ್ಮಯ ಬಲವು
ಅತ್ತರೇನು ಫಲ ಎತ್ತಿನೋಡಿ ತಲೆ
ಹತ್ತಿರದಿ ನಾನಿಹೆ ಸತತ 4
ಭಯವೇತಕೆ ದಾರಿದ್ರ್ಯದಲಿ
ಭಯವೇತಕೆ ಜನರನು ಬಿಡಲು
ಭಯವೇತಕೆ ಲೌಕಿಕವಿರದಿರಲು
ಅಭಯ ಪ್ರಸನ್ನನಿರೆ ಹೃದಯದಲಿ 5
ಬೊಗಳುವರಿರುವರು ಹೊಗಳುವರಿರುವರು
ಹಗರಣವೇತಕೆ ಮಾನಸದಿ
ಒಗೆಯಿರಿ ಹಗೆತನ ನಗುತ ನಗುತಲಿರಿ
ಜಗವೆ ಹೊಸ ಮೊಗ ತೋರುವುದು6