ದಿಮ್ಮಾಕ ನಿನಗ್ಯಾಕೆ ಎಲೆ ಎಲೆ
ಜಮ್ಮಾಸಿ ಜರ ತಿಳಿಕೊ ಪ
ದಿಮ್ಮಾಕ ನಿನಗ್ಯಾಕೆ ಛೀಮಾರಿ ನಿನ್ನ
ದಿಮ್ಮಾಕ ಮುರಿಲಿಕ್ಕೆ ಗುಮ್ಮವ್ವ ನಿಂತಾಳೆ ಅ.ಪ
ಸೊಕ್ಕಿನಿಂದ ನಡೆವಿ ಮುಂದಿಂದು
ಲೆಕ್ಕಕ್ಕೆ ತರದಿರುವಿ
ಫಕ್ಕನೊಯ್ದೆಮನವರು ಉಕ್ಕಿನ ಪ್ರತಿಮೆಯ
ತೆಕ್ಕೆಯೊಳಾನಿಸಿ ನಿನ್ನ ಒಕ್ಕಲಿಕ್ಕುವರವ್ವ 1
ತಾರತಿಗಡಿ ತುಸು ವಿ
ಚಾರಮಾಡಿನೋಡು
ಘೋರ ಯಮದೂತರು ಹಾರೆ ಕಾಸಿ ಯೋನಿ
ದ್ವಾರದಿ ಸೇರಿಸಿ ಘೋರ ಬಡಿವರವ್ವ 2
ಪಾಮರಳಾದಲ್ಲೆ ಮುಂದಿನ
ಕ್ಷೇಮವ ಮರೆತಲ್ಲೇ
ಭೂಮಿಸುಖಕೆ ಮೆಚ್ಚಿ ತಾಮಸದಲಿ ಬಿದ್ದು
ಸ್ವಾಮಿ ಶ್ರೀರಾಮನ ಪ್ರೇಮಕ್ಕೆ ದೂರಾದಿ 3