ಏನಿದು ಮಹದಪರಾಧ ಮಾಡಿದೆ ನಾನು
ನಿನ್ನವರನೆ ನಿಂದಿಸಿದೆ ತಿಳಿಯದಭವ ದೇವ ಪ
ಜ್ಞಾನವಿಡಿದಿ ನೋಡದೆ ತುಸು
ಏನುಕಾಣದೆ ನಾನಾಪರಿಯಲಿ
ಶ್ವಾನನಂದದಿ ಚೀರುತ್ಹಾರುತ
ಹೀನವಾಚಗಳ್ವಾಚಿಸಿದೆನೋ ಅ.ಪ
ತತ್ತ್ವದರ್ಥಕರಾಗಿ ಗುಪ್ತದಿಂದಿರ್ವವರ
ನರ್ತುನೋಡದೆ ಅನರ್ಥವಾಡಿದೆನೋ ಪ್ರಭೋ
ಮತ್ರ್ಯಗುಣಗಳ ಮರ್ತುಬಿಡದೆ
ನಿರ್ತಮಾನಿಸರ ಗುರ್ತುತಿಳಿಯದೆ
ಕತ್ತೆಯಂತೊದರುತ್ತ ಸತ್ಯರ
ಕೃತ್ತಿಮರೆಂದೆನುತ ಜರಿದೆ 1
ಮೀನು ಜಿಹ್ವೆಯ ರುಚಿಗಾ
ಗೇನು ತಿಳಿಯದೆ ಪೋಗಿ
ಗಾಣ ಸೆಳೆದುನುಂಗಿ ಪ್ರಾಣಕೊಟ್ಟಂತೆ ಹರಿಯೆ
ಗಾನಲೋಲನ ಮನದೊಳಿಟ್ಟು
ಧ್ಯಾನಿಪ ಕೋವಿದಸುಜನರ
ಖೂನವಿಲ್ಲದೆ ಮನಕೆ ಬಂದಂತೆ
ಕಾಣದಂಧಕನಂತೆ ಜರಿದೆ 2
ನಿನ್ನಿಂದೆ ನಾ ಬಂದೆ ನೀನೆನ್ನ ತಂದೆ ಮುಂ
ದಿನ್ನಿಂಥ ದುರ್ಮತಿಯನ್ನು ಕೊಡದಿರೊ ರಂಗ
ನಿನ್ನ ದಾಸರೊಳಿಟ್ಟು ಅನುದಿನ
ಭಿನ್ನವಿಲ್ಲದೆ ರಕ್ಷಿಸಯ್ಯ
ನಿನ್ನ ಚರಣದಾಸರ ನಾಮ
ಪನ್ನಂಗಶಾಯಿ ವರ ಶ್ರೀರಾಮ 3

ಸರ್ವಾಂತರ್ಯಾಮಿ ಸರ್ವೇಶ ಬಾರೊ
ಸರ್ವಸ್ವತಂತ್ರನೆ ಸರ್ವಭಯನಾಶ ಪ
ಸರ್ವತಂತ್ರನೆ ಸರ್ವವೇದದಿ
ಸರ್ವತತ್ತ್ವದಿ ಸರ್ವಸಾಕ್ಷಿ ನೀ
ಸರ್ವವ್ಯಾಪಕ ಸರ್ವದೇವರ ಸಾರ್ವಭೌಮ ಅ.ಪ
ಜಡಬೊಂಬೆ ನಾಟಕರಚಿಸಿ
ಎಡಬಿಡದೆ ಕುಣಿಸ್ಯಾಡುವಿ ಕಡುಮೋಹಗೊಳಿಸಿ
ಕಡುಗೌಪ್ಯದದರೊಳು ನೆಲೆಸಿ ನೀನೆ
ಅಗಣಿತ ಕಲ್ಪನೆವೆರಸಿ
ಜಡಕೆ ಜಡವಾದ ತೊಡರಿನಾಟದ
ಕೆಡಕು ತಪ್ಪಿಸಿ ಪಿಡಿದು ಎನ್ನನು
ಒಡೆಯ ನಿನ್ನಡಿ ಭಕ್ತರಾವಾಸ
ದಿಡು ಎಂದೆರಗುವೆ ಪಾಲಿಸಭಯ 1
ನಾನಾವಿಧದ ಸೃಷ್ಟಿಗಳ ಸೃಜಿಸಿ
ಪೋಣಿಸಿ ಮಾಡಿಟ್ಟ ಭವವೆಂಬ ಮಾಲೆ
ಏಳು ಮೋಹವ ತುಂಬಿದೆಲ ಪುಸಿ
ಕಾಣದಂತೊಗೆದಿ ಮಹಾಮಾಯದ ಜಾಲ
ನಾನು ನೀನೆಂಬ ಜಾಣರೆಲ್ಲ ಬಿದ್ದು
ಏನುಕಾಣದೆ ತ್ರಾಣಗೆಟ್ಟರು
ಹೀನಮತಿ ನಾನೇನು ಬಲ್ಲೆನು
ನೀನೆ ಸಲಹೆನ್ನ ದೀನರಕ್ಷಕ 2
ಪಾವನ ಪರಮಪ್ರಕಾಶ ದೇವ
ಭಾವಜನಯ್ಯ ನಿಜಭಾವಿಗಳರಸ
ಕೇವಲಸುಗುಣಾಂತರ್ವಾಸ ನಿನ್ನ
ಸೇವಕನೆನಿಸೆನ್ನ ಕಾಯೊ ನುತಪೋಷ
ಜೀವಜೀವರಜೀವ ಚೈತ್ಯನದೇವ
ದೇವರ ದೇವ ನಂಬಿದೆ ಜಾವ
ಜಾವಕೆ ಒದಗುತಿಹ್ಯ ಮಹ
ನೋವು ಗೆಲಿಸೆನ್ನಯ್ಯ ಶ್ರೀರಾಮ 3