ನಂದು ನಂದೆಂದೇಕೆ ಬಂಧ ಪಡೆಯುವಿಯೋ ಮಂದಮನ
ತಂದೆ ಗೋವಿಂದ ತೋರುವ ಜಗಕೆ ಪ
ಚಳಿಗಾಳಿ ನಿನ್ನದೆ ಮಳೆಬೆಳೆ ನಿನ್ನದೆ
ಎಲೆಮನಸೆ ನೋಡು ನೀನೊಳಿತಾಗಿ ತಿಳಿದು 1
ನಿಶೆದಿನ ನಿನ್ನದೆ ವಸುಧೆಸ್ಥಿತಿ ನಿನ್ನದೆ
ಪಶುವಿನಂದದಿ ಮನಸೆ ವ್ಯಸನದಲಿ ಬಿದ್ದು 2
ಆರುಮಾಡಿದ ಸೃಷ್ಟಿಗ್ಹಾರೈಸಿ ಕೆಡುವಿಯೋ
ಮಾರಪಿತ ಶ್ರೀರಾಮ ಪಾದವಾರಿಜನಂಬದೆ 3

ಸಾಸಿರ ಮಾತುಗಳ್ಯಾಕೊ ಎಲೆಮನ
ಕೇವಲ ಹರಿನಾಮವೊಂದೆ ಸಾಕೊ ಪ
ಸ್ನಾನವುಯಾಕೊ ಮೌನವುಯಾಕೊ
ದಾನವಾರಿಯಧ್ಯಾನವೊಂದೆ ಸಾಕೊ 1
ಮಂತ್ರವುಯಾಕೊ ತಂತ್ರವುಯಾಕೊ
ಮಂತ್ರಮೂರ್ತಿ ಚಿಂತೆಯೊಂದೆ ಸಾಕೊ 2
ಹೋಮವುಯಾಕೊ ನೇಮವುಯಾಕೊ
ಸ್ವಾಮಿ ಶ್ರೀರಾಮನ ಭಕ್ತಿಯೊಂದೆ ಸಾಕೊ 3