ಶೂರತನವೇನೊ ಬಲು
ನಾರಿ ಜನರು ನೀರೊಳಿರಲು ಪ
ಸೀರೆಗಳ ಅಪಹರಿಸುತ ಬಲು
ಶೌರಿ ಅ.ಪ
ಸಾರಸವದನನೆ ಕಾರಣವಿಲ್ಲದೆ
ನಾರಿಯರೆಮ್ಮನು ಸೇರಿ ಬಹಳ ಸರಸಗಳನ್ನು
ತೋರಿ ಮಾನಸೂರೆಗೆಯ್ಯುವುದು
ಭಾರಿ ನಡತೆ ಎಂದರಿತಿರುವಿಯೇನೊ 1
ಮುರಹರನೆ ಈ ಪರಿಯಲಿರುವ ಎಮ್ಮ
ಕರಗಳ ಮುಗಿವುದು ತರವೇ ಬಹಳ ಮನ ಜರಿಯುವುದು
ಸರಿಯೇ ಇಂತು ಕೋರುತಲಿರುವುದು
ಮುರಳೀಧರನೆ ವಸನಗಳನು ಕೊಡೆಲೊ 2
ಬಿಸಜನಯನ ಇದು ಹೊಸ ಪರಿಯಲ್ಲವೆ
ರಸಿಕ ಜನರು ಪರಿಹಾಸ ಮಾಡಿ ಮುಸಿ ಮುಸಿ ನಗುವರು
ಶ್ರೀಶ ನಿನಗೆ ಪಸುಳೆ ಜನರ ಸಹ
ವಾಸವೇ ಪ್ರಸನ್ನವದನ ಕೃಷ್ಣ 3