ಕೃಷ್ಣಚಿತ್ತ ಕೃಷ್ಣಚಿತ್ತ ಕೃಷ್ಣಚಿತ್ತ ಎನ್ನಿರೊ ಪ.
ಕೃಷ್ಣಧ್ಯಾನದಿಂದ ಪರಮ ತುಷ್ಟರಾಗಿ ಸುಖದುಃಖ
ಕಷ್ಟ ಕರ್ಮಂಗಳು ಎಲ್ಲ ಅಷ್ಟು ಹರಿಯಾಧೀನವೆಂದು ಅ.ಪ.
ಜನನವಾದ ಕಾಲದಿಂದ
ಇನಿತು ಪರ್ಯಂಕಾರದಲ್ಲಿ
ಅನುಭವಿಸಿದಂಥ ಕರ್ಮ
ಗುಣನಿಧಿಯಾಧೀನವೆಂದು1
ಕಷ್ಟದಲ್ಲಿ ಕಳೆದ ಕಾಲ
ಅಷ್ಟರಲ್ಲೆ ಪಟ್ಟ ಸುಖ
ಕೊಟ್ಟ ಹರಿಯು ಎನಗೆ ಎನುತ
ಕೆಟ್ಟ ವಿಷಯ ಮನಕೆ ತರದೆ 2
ಕಾಮ ಕ್ರೊಧ ಲೋಭ ಮೋಹ
ಆ ಮಹಾ ಮದ ಮತ್ಸರಗಳು
ಕಾಮಿಸಿ ಮನ ಕೆಡಿಸುತಿರಲು
ಶ್ರೀ ಮನೋಹರನಾಟವೆಂದು 3
ಪೊಂದಿದಂಥ ಮನುಜರಿಂದ
ಕುಂದು ನಿಂದೆ ಒದಗುತಿರಲು
ಇಂದಿರೇಶನ ಕರುಣವೆಂದು
ಒಂದು ಮನಕೆ ತಾರದಂತೆ 4
ಮಾನ ಅಪಮಾನಗಳು
ದೀನನಾಥನಧೀನವೆಂದು
ಜ್ಞಾನಿಗಳ ವಾಕ್ಯ ನೆನೆದು
ಮಾನಸದ ದುಃಖ ಕಳೆದು 5
ಹೊಟ್ಟೆ ಬಟ್ಟೆಗೊದಗುವಂಥ
ಅಷ್ಟು ಕಷ್ಟ ಸುಖಗಳೆಲ್ಲ
ವಿಷ್ಣುಮೂರ್ತಿ ಕೊಟ್ಟನೆಂದು
ಮುಟ್ಟಿ ಮನದಿ ಹರಿಯ ಪದವ 6
ಹರಿಯ ಧ್ಯಾನ ಮಾಡುವುದು
ಹರಿಯ ಧ್ಯಾನ ಅರಿಯುವುದು
ಮೂರ್ತಿ ಕಾಣುವುದು
ಹರಿಯಧೀನವೆಂದು ತಿಳಿದು 7
ಗುರುಕೃಪೆಯಿಂ ದತ್ತವಾದ
ವರ ಸುಜ್ಞಾನವರೆಯ ತಿಳಿದು
ಹರುಷ ಕ್ಲೇಶಾ ಮನಕೆ ತರದೆ
ಮೂರ್ತಿ ಮನಕೆ ತಂದು 8
ನಿಷ್ಟೆಯಿಂ ಗೋಪಾಲ
ಕೃಷ್ಣವಿಠ್ಠಲಾಧೀನ ಜಗವು
ಇಟ್ಟ ಹಾಗೆ ಇರುವೆನೆಂದು
ಗಟ್ಟಿಮನದಿ ಹರಿಯ ಪೊಂದಿ 9

ಯಾರಿರಬಹುದೀತ ಗೆಳತೀ
ಯಾರಿರಬಹುದೀತ ಪ
ಯಾರೆಂದರಿಯದೆ ಪೋಗದೆ ಕೊರತೆ
ಯಾರಿರಬಹುದೀತ ಅ.ಪ
ಸಾವಿರ ಸಂಖ್ಯೆಯ ಗೋವಳರಿದ್ದರೂ
ಯಾವನಿಗೀ ವಿಧ ಠೀವಿಯಿರುವುದೇ
ಹಾವಭಾವಗಳ ನೋಡಲು ಈತನ
ಗೋವಳ ವೇಷವದಾವ ಕಾರಣವೋ 1
ನಮಗೇತಕೆ ಈತನ ಗೋಜೆಂದರು
ಕಮನೀಯನ ನೋಡುತ ನೋಡುತ ಬಲು
ಮಮತೆಯು ಮನದಲಿ ಏರುತಲಿರುವುದು
ಕಮಲನಯನೆ ನಾ ನಮಿಸುವೆ ಪೇಳೆ 2
ಸರಳನೋ ದುರುಳನೋ ಅರಿಯುವುದೆಂತೇ
ಕರೆಯದೆ ಹೋದರೆ ಜರಿಯಲುಬಹುದೇ
ಮುರಳಿಯ ನಾದದ ಕರೆ ಬಂದರೆ ನಾ
ಬರವೆನೆಂದರು ಹೇ ಸರಸ ಪ್ರಸನ್ನ 3

ಶೋಭನವೆನ್ನಿರೋ ಶೋಭನ ಬನ್ನಿರೆ
ಶೋಭನ ಬನ್ನಿ ಸವ್ಯದಿಂದ ಧ್ರುವ
ಶೋಭಾನವೆಂಬೋದು ಸೋಹಂಭಾವಗುಣ
ಅಹಂಭಾವಿಗಳು ಅರಿಯವು
ಅಹಂಭಾವಿಗಳು ಅರಿಯುವು ಅನಂಗನ
ಅಹಂಭ್ರಮೆಯು ವಿಪರೀತ 1
ಶೋಭನವೆನ್ನಿರೇ ಸಿದ್ಧಾಂತನುಭವಿಗಳು
ಕಾಮಿ ಕಾಮಣ್ಣನ ಮದುವಿಗೆ
ಪ್ರಾಣಿ ಮಾತ್ರಗಳೆಲ್ಲ ಬರಬೇಕು 2
ಶೋಭನವೆನ್ನಿರೇ ಮದೂಣಿಗಾನಂಗಗೆ
ಕಾಮಿತದಳಗಿತ್ತಿ ಅರಸಗ
ಕಾಮಿತದಳಗಿತ್ತಿ ಅರಸ ಮೋಹನ್ನಗೆ
ನೆರೆಯಿತು ಲೋಕ ಧರೆಯೊಳು 3
ಶೋಭನವೆನ್ನಿರೇ ಕಾಮಿ ಕಾಮಣ್ಣಗೆ
ಕಾಯದೊಳೀಹ್ಯ ಕರುಣಿಗೆ
ಕಾಯದೊಳಿದ್ದು ಮೆರೆವ ಅನಂಗನು
ಚರ್ಮದಬೊಂಬಿ ಗುರುತಾಗಿ 4
ಶೋಭನವೆನ್ನಿರೇ ಸಜ್ಜನ ಸಾವಿತ್ರೇರು
ಆನಿ ಮೊದಲೆ ಇರುಹು ಕಡಿಗೆಲ್ಲ
ಆನಿಮೊದಲೆ ಇರುಹು ಕಡಿಗೆಲ್ಲ ಮಹಿಪತಿ
ಶೋಭಾನಯೆಂದ ಸಬೂದಿಂದ 5