ಏಳಯ್ಯ ರಾಕ್ಷಸಾಂತಕ ದನುಜಸಂಹಾರ ಪ
ಏಳಯ್ಯ ರಾಜೀವನಯನ ನವನೀತಚೋರ
ಏಳು ಲಕ್ಷ್ಮೀಮನೋಹರ ಹರಿಯೆ ಅ.ಪ
ದಿನಪನುದಯಂಗೆಯ್ಯೆ ದಿಕ್ಪಾಲಕರ್ನೆರೆಯೆ
ಕನಕಭೂಷಣದ ಕಾಂತೆಯರು ಆರತಿಪಿಡಿಯೆ
ಅನುಪಮಗೆ ಜಯವೆಂದು ಬಂದು ನಿಂದೈದಾರೆ
ಇನಕುಲನೆ ನಲಿದುಪ್ಪವಡಿಸು ಶ್ರೀಹರಿಯೇ 1
ಪ್ರಹ್ಲಾದ ನಾರದರು ವಾಸಿಷ್ಠ ವಿಶ್ವಾಮಿತ್ರರು
ಮಹಮುನಿಗಳತ್ರಿ ಭಾರದ್ವಾಜ ಜಮದಗ್ನಿ ಗೌತಮರು
ಬಹುವಿಧದಿ ಕಶ್ಯಪರು ಹನುಮಂತ ತುಂಬುರರು
ಹರುಷದಿ ಪಾಡುತ್ತಲೈದಾರೆ ಇನಕುಲನೆ ನಲಿದು 2
ದೇವಗಂಗೆಯಕೊಂಡು ದೇವರ್ಕಳೈದಿದರು
ದೇವತಾವಳಿ ಬಂದು ದೇವ ಜಯವೆನುತಿಹರು
ದೇವಪುರದಲಿ ನಿಂದ ದೇವಕಿಯ ವರಕಂದ
ದೇವ ಲಕ್ಷ್ಮೀಪತಿಯ ದೇವ ನೀನೇಳೈ ಹರಿಯೇ 3

ಜಯ ಜಯವೆನ್ನಿ ಗುರು ಜಗದೀಶಗೆ
ಜಯ ಜಯ ಜಗತ್ರಯ ಪಾವನಗೆ ಧ್ರುವ
ಆನಂದೊ ಬ್ರಹ್ಮ ಆನಂದ ಕಂದಗೆ
ಅನುದಿನ ಜಯ ಜಯ ಅನುಪಮಗೆ
ಸನಕ ಸನಂದನ ವಂದಿತಗೆ
ಮುನಿಜನ ಹೃದಯ ನಿವಾಸಗೆ 1
ನಿತ್ಯ ನಿರ್ಗುಣಗೆ
ಅಗಣಿತಗುಣ ಪರಿಪೂರ್ಣಗೆ
ಝಗಿಝಗಿಸುವ ಜಗನ್ಮೋಹನಗೆ
ಜಗಜ್ಜೀವ ಜಗದಾತ್ಮಗೆ 2
ಜಯ ಜಯ ಮಂಗಳ ಮಹಾಮುನಿಗೆ
ಮಹಿಮಾನಂದ ಗುರುಮೂರ್ತಿಗೆ
ಮಹಿಪತಿ ಸ್ವಾಮಿ ಸರ್ವೋತ್ತಮಗೆ
ಜಯ ಜಯವೆನ್ನಿರೊ ಜಗದೊಳಗೆ 3