ನಿನ್ನ ನಾ ಬಿಡುವನಲ್ಲಾ ಗೋಪಾಲಾ ನಿನ್ನ ಬಿಡುವನಲ್ಲ
ಎನ್ನ ರಕ್ಷಿಸದಿರೆ ಪನ್ನಗಾದ್ರಿಯವಾಸ ಪರಮಪುರುಷರಂಗಾ ಪ
ನಾಗಾರಿ ರೂಪನಾದ ಪರಮಾನಂದ
ಭೋಗಿಶಯನ ವಿನೋದ ಭಕ್ತವತ್ಸಲ
ಸಾಗರನಳಿಯ ಭೂಸುರಧೇನು ಪೋಷಕ
ಭಾಗವತರ ಪ್ರಿಯಾ ಯೋಗಿಗಳರಸ1
ಜಲಜಾಕ್ಷ ನಳಿನನಾಭ ಜಾನಕೀರಮಣ
ಜಲನಿಧಿಶಯನ ದೇವಾ ಜಗದೋದ್ಧಾರ
ಜಲಜಬಾಂಧವ ಕುಲ ಶ್ರೇಷ್ಠಾದಿ ಮೂರುತಿ
ಒಲಿದೆನ್ನ ದುಷ್ಕರ್ಮನಳಿದು ಪೋಷಿಸದಿರೆ 2
ಶಂಬರಾರಿಯ ಪಿತನೆ ಜಗನ್ನುತ
ಕುಂಭಿನೀಧವನಾದನೇ ಗೋವಿಂದ ಶ್ರೀ
ಕಂಬುಕಂಧರ ಕೃಷ್ಣಾ ಅಂಬುಧಿ
ಬಂಧಿಸಿ ಅಂಬುಜಾಕ್ಷಿಯ ತಂದ ಹರಿ 'ಹೆನ್ನ ವಿಠ್ಠಲಾ’ 3